Fact Check: గాలె వేదికగా శ్రీలంకతో ప్రారంభమైన తొలి టెస్టు మొదటి రోజు దేవదత్ పడిక్కల్ 131 పరుగులతో విరుచుకుపడ్డాడు. 9 ఫోర్లు, ఒక సిక్సర్తో సెంచరీ పూర్తి చేసుకున్న ఆయనపై సోషల్ మీడియాలో ఒక వార్త విపరీతంగా వైరల్ అవుతోంది. ఆగస్ట్ 15 స్వాతంత్య్ర దినోత్సవం రోజున సెంచరీ చేసిన తొలి భారతీయ ఆటగాడు పడిక్కల్ అంటూ జరుగుతున్న ప్రచారం పూర్తిగా అవాస్తవం. ఇండిపెండెన్స్ డే రోజున భారత్ తరఫున సెంచరీ బాదిన తొలి బ్యాటర్ రికార్డు పడిక్కల్ కంటే ముందే మరో రన్ మెషిన్ ఖాతాలో ఉంది.
స్వాతంత్య్ర దినోత్సవం రోజున భారత్ తరఫున అంతర్జాతీయ మ్యాచ్లో మొదటి సెంచరీ సాధించిన ఘనత టీమిండియా రన్ మెషిన్ విరాట్ కోహ్లీకే దక్కుతుంది. 2019లో వెస్టిండీస్తో జరిగిన వన్డే మ్యాచ్లో ఛేజింగ్ చేస్తూ కోహ్లీ 99 బంతుల్లో 14 ఫోర్ల సాయంతో నాటౌట్గా 114 పరుగులు చేశారు. ఆ మ్యాచ్ వెస్ట్ ఇండీస్లోని త్రినిడాడ్లో స్థానిక సమయం ప్రకారం ఆగస్ట్ 14న జరిగింది. అయితే కోహ్లీ సెంచరీ పూర్తి చేసుకునే సమయానికి భారత కాలమానం ప్రకారం తేదీ మారడంతో మన దేశంలో ఆగస్ట్ 15 స్వాతంత్య్ర దినోత్సవం అయింది. ఆ సెంచరీ ఆధారంగా భారత్ ఆ మ్యాచ్లో 6 వికెట్ల తేడాతో విజయం సాధించింది.
విరాట్ కోహ్లీ సాధించిన ఆ ఘనత తర్వాత స్వాతంత్య్ర దినోత్సవం రోజున భారత్ తరఫున సెంచరీ చేసిన రెండో బ్యాటర్గా దేవదత్ పడిక్కల్ నిలిచారు. పడిక్కల్ సుదీర్ఘ కాలం పాటు జట్టులో అవకాశం కోసం వేచి చూశారు. రెండేళ్ల విరామం తర్వాత లభించిన ఈ అవకాశాన్ని చక్కగా వినియోగించుకుని తన అంతర్జాతీయ కెరీర్లో తొలి టెస్టు శతకాన్ని నమోదు చేసుకున్నారు. ఆగస్ట్ 15న టెస్ట్ మ్యాచ్ వేదికపై నేరుగా సెంచరీ కొట్టిన తొలి భారత ఆటగాడిగా మాత్రం పడిక్కల్ ప్రత్యేక గుర్తింపు పొందారు.
Devdutt Padikkal becomes the first Indian to score a Hundred on Independence Day. 🔥 — Johns. (@CricCrazyJohns) August 15, 2026 గాళ్ అంతర్జాతీయ స్టేడియంలో శ్రీలంకతో మొదలైన ఈ పోరులో తొలి రోజు ఆట ముగిసే సమయానికి టీమిండియా 73 ఓవర్లలో 2 వికెట్ల నష్టానికి 288 పరుగుల భారీ స్కోరు సాధించింది. పడిక్కల్ 131 పరుగులతో, రిషభ్ పంత్ 27 పరుగులతో క్రీజులో ఉన్నారు. అంతకుముందు కేఎల్ రాహుల్ కండరాల పట్టివేత కారణంతో 77 పరుగుల వద్ద రిటైర్డ్ హర్ట్గా వెనుదిరిగారు. ఓపెనర్ యశస్వి జైస్వాల్ 32 పరుగులు చేసి రనౌట్ కాగా, కెప్టెన్ శుభ్మన్ గిల్ 16 పరుగులకే ప్రభాత్ జయసూర్య బౌలింగ్లో నిష్క్రమించారు. సోషల్ మీడియాలో విపరీతంగా వైరల్ అవుతున్నట్లుగా స్వాతంత్య్ర దినోత్సవం రోజు సెంచరీ సాధించిన తొలి భారత ఆటగాడు దేవదత్ పడిక్కల్ కాదు. 2019లోనే విరాట్ కోహ్లీ ఈ మైలురాయిని అందుకోగా, పడిక్కల్ ఈ రికార్డు సాధించిన రెండో భారతీయ ఆటగాడిగా చరిత్రకెక్కారు.
మరిన్ని క్రీడా వార్తల కోసం ఇక్కడ క్లిక్ చేయండి..
