CSK New Head Coach: చెన్నై సూపర్ కింగ్స్ అభిమానులకు ఒక ఊహించని వార్త షాక్ ఇస్తోంది. ఐపీఎల్ చరిత్రలోనే అత్యంత విజయవంతమైన కోచ్లలో ఒకరైన స్టీఫెన్ ఫ్లెమింగ్ స్థానంలో కొత్త కోచ్ రాబోతున్నాడనే ప్రచారం ఊపందుకుంది. టీమిండియా మాజీ దిగ్గజ స్పిన్నర్ రవిచంద్రన్ అశ్విన్ ఇచ్చిన ఒక్క ప్రకటనతో ఈ వార్త ఇప్పుడు సామాజిక మాధ్యమాల్లో వైరల్ అవుతోంది.
సీఎస్కే మార్పులపై అశ్విన్ కీలక వ్యాఖ్యలు..
ఐపీఎల్ మైదానంలో ఎన్నో అద్భుత విజయాలను అందించిన చెన్నై సూపర్ కింగ్స్ డ్రెస్సింగ్ రూమ్లో త్వరలోనే పెద్ద మార్పులు చోటుచేసుకోనున్నాయనే వార్త క్రికెట్ అభిమానులను ఆశ్చర్యానికి గురిచేస్తోంది. ఇంగ్లాండ్ జట్టుకు వన్డే ప్రపంచకప్ అందించి సరికొత్త చరిత్ర సృష్టించిన మాజీ సారథి ఇయాన్ మోర్గాన్ సీఎస్కే తదుపరి ప్రధాన కోచ్గా బాధ్యతలు చేపట్టే అవకాశం ఉందంటూ సీనియర్ స్పిన్నర్ రవిచంద్రన్ అశ్విన్ కీలక వ్యాఖ్యలు చేశారు. చాలా కాలంగా జట్టును విజయవంతంగా నడిపిస్తున్న స్టీఫెన్ ఫ్లెమింగ్ స్థానాన్ని మోర్గాన్ భర్తీ చేస్తారని అశ్విన్ బాంబు పేల్చారు. ఈ వ్యాఖ్యలతో సీఎస్కే యాజమాన్యం నిజంగానే కోచింగ్ స్టాఫ్ను మార్చబోతోందా అనే చర్చలు జోరందుకున్నాయి.
ఎక్కువమంది చదివింది: Video: ట్రావిస్ హెడ్కి అసలైన మొగుడు ఎంట్రీ ఇచ్చేశాడుగా.. సొంతగడ్డపై దిమ్మతిరిగే షాక్..!
స్టీఫెన్ ఫ్లెమింగ్ సుదీర్ఘ ప్రయాణానికి ముగింపు..
చెన్నై సూపర్ కింగ్స్ విజయంలో మాజీ న్యూజిలాండ్ కెప్టెన్ స్టీఫెన్ ఫ్లెమింగ్ పాత్ర ఎంతో ఉంది. మహేంద్రసింగ్ ధోనీతో కలిసి మైదానంలోనూ, డ్రెస్సింగ్ రూమ్లోనూ ఆయన అమలు చేసిన వ్యూహాలు జట్టును ఐదుసార్లు ఐపీఎల్ ఛాంపియన్గా నిలబెట్టాయి. ఆటగాళ్లను ప్రోత్సహిస్తూ ప్రశాంతంగా నిర్ణయాలు తీసుకోవడంలో ఫ్లెమింగ్ తనకంటూ ఒక ప్రత్యేక గుర్తింపు తెచ్చుకున్నారు. అయితే మారుతున్న ఆధునిక క్రికెట్ అవసరాలకు అనుగుణంగా జట్టులో కొత్త రకం ఆలోచనలు, వేగవంతమైన నిర్ణయాలు అవసరమని యాజమాన్యం భావించింది. ఈ క్రమంలోనే పవర్ హిట్టింగ్, దూకుడుతో కూడిన బజ్బాల్ తరహా వ్యూహాలకు ప్రాధాన్యతనిచ్చే మోర్గాన్ పేరు తెరపైకి వచ్చింది.
ఇయాన్ మోర్గాన్ నయా వ్యూహాలు పనికొస్తాయా..?
2019లో ఇంగ్లాండ్ జట్టుకు మొదటిసారి వన్డే ప్రపంచకప్ అందించిన ఘనత ఇయాన్ మోర్గాన్కు సొంతం. ఇంగ్లీష్ క్రికెట్ వైఖరిని మార్చి, పరిమిత ఓవర్ల క్రికెట్లో ఆ జట్టును అత్యంత ప్రమాదకరమైన జట్టుగా తీర్చిదిద్దడంలో మోర్గాన్ వ్యూహాలే కీలకంగా నిలిచాయి. గతంలో కేకేఆర్ జట్టుకు కెప్టెన్గా వ్యవహరించి ఫైనల్ వరకు తీసుకెళ్లిన అనుభవం కూడా అతనికి ఉంది. నిలకడగా ఉండే సీఎస్కే సంస్కృతికి మోర్గాన్ అనుభవం, ఆధునిక క్రికెట్ ఆలోచనలు తోడైతే జట్టు ప్రదర్శన మరింత అద్భుతంగా ఉంటుందని భావిస్తున్నారు. అందుకే ఫ్లెమింగ్ నుంచి ఈ బాధ్యతలను మోర్గాన్కు అప్పగించడం సరైన నిర్ణయమే అవుతుందనే అభిప్రాయాలు వ్యక్తమవుతున్నాయి.
ఎక్కువమంది చదివింది: 41 సిక్సర్లు, 39 ఫోర్లతో 487 పరుగులు.. భారీ ప్రపంచ రికార్డ్తో టీ20 హిస్టరీనే షేక్ చేశారుగా..!
రవిచంద్రన్ అశ్విన్ చేసిన ఈ సంచలన వ్యాఖ్యలు చూసి పసుపు సైన్యం ఒక్కసారిగా ఉలిక్కిపడింది. దశాబ్ద కాలానికి పైగా ధోనీ, ఫ్లెమింగ్ కాంబినేషన్ను చూసిన అభిమానులకు ఈ మార్పును జీర్ణించుకోవడం కాస్త కష్టంగానే మారింది. స్టీఫెన్ ఫ్లెమింగ్ స్థానాన్ని భర్తీ చేయడం అంత సులువైన విషయం కాదని, కానీ మోర్గాన్ లాంటి చాకచక్యం ఉన్న నాయకుడు కోచ్గా వస్తే ఫలితాలు వేరే స్థాయిలో ఉంటాయని నెటిజన్లు కామెంట్లు చేస్తున్నారు. అయితే దీనిపై సీఎస్కే ఫ్రాంచైజీ నుంచి అధికారిక ప్రకటన వస్తే తప్ప ఈ వార్తల్లో ఉన్న నిజానిజాలు స్పష్టంగా తెలియవు.
మరిన్ని క్రీడా వార్తల కోసం ఇక్కడ క్లిక్ చేయండి..
