ITR 3,4,5,7 Filing: ఆదాయపు పన్ను రిటర్నులు ఫైల్ చేసేందుకు గడువు జులై 31తోనే ముగిసిపోయిందని చాలా మంది భావిస్తుంటారు. అయితే ఈ ఏడాది నుంచి కొన్ని కేటగిరీల ట్యాక్స్ పేయర్లకు ఐటీ రిటర్నులు దాఖలు చేసేందుకు గడువును ఆగస్టు 31 వరకు అందించారు. ఈ క్రమంలో ఇన్కమ్ ట్యాక్స్ పేయర్లకు ఆదాయపు పన్ను శాఖ కీలక హెచ్చరిక జారీ చేసింది. అసెస్మెంట్ ఇయర్ 2026-27కు గానూ వ్యాపార లేదా వృత్తిపరమైన ఆదాయం (Business Or Professional Income) కలిగి ఉండి, ఆదాయపు పన్ను చట్టం 1961 ప్రకారం ఆడిట్తో ప్రమేయం లేని వ్యక్తులు, సంస్థలు తమ ఐటీఆర్ను సమర్పించేందుకు చివరి తేదీ ఆగస్టు 31 వరకుమాత్రమేనని తెలిపింది. తమ ఖాతాలు ఆడిట్ అవసరం లేని, ఐటీఆర్ 3, 4, 5, 7 ఫారాలు సమర్పించే వారు వెంటనే ఆ పని పూర్తి చేయాలని ఆదాయపు పన్ను శాఖ సూచించింది. ఐటీఆర్- 3 (ITR-3) ఫారాన్ని వ్యాపారం లేదా వృత్తి ద్వారా ఆదాయం పొందే వ్యక్తులు, హిందూ అవిభాజ్య కుటుంబాలు ఫైల్ చేయవచ్చు. ఐటీఆర్-4 (ITR-4 Sugam) ఫారాన్ని సెక్షన్ 44ఏడీ, 44ఏడీఏ, 44ఏఈ కింద ప్రిజెంప్టివ్ టాక్సేషన్ స్కీమ్ ఎంచుకున్న చిన్న వ్యాపారులు, నిపుణులు ఫైల్ చేయాల్సి ఉంటుంది. ఐటీఆర్-5 (ITR-5) ఫారాన్ని భాగస్వామ్య సంస్థలు, ఎల్ఎల్పీలు, ఏఓపీ, బీఓఐలు ఫైల్ చేయాల్సి ఉంటుంది. ఐటీఆర్-7 (ITR-7) ఫారాన్ని చారిటబుల్ ట్రస్టులు, రాజకీయ పార్టీలు, పరిశోధనా సంస్థలు, ఇతర ప్రత్యేక కేటగిరీల్లోని ట్యాక్స్ పేయర్లు ఫైల్ చేయాల్సి ఉంటుంది.ఐటీ శాఖ కీలక ప్రకటనఆగస్టు 31వ తేదీ సమీపిస్తున్న క్రమంలో సోషల్ మీడియా ఎక్స్ వేదికగా ఇన్కమ్ ట్యాక్స్ విభాగం కీలక హెచ్చరిక చేసింది. చివరి నిమిషంలో ఆదాయపు పన్ను ఇ-ఫైలింగ్ పోర్టల్ లో ట్రాఫిక్ తీవ్రంగా పెరిగి సాంకేతిక సమస్యలు లేదా సర్వర్ స్లో అయ్యే ప్రమాదం ఉందని, ముందే ఫైల్ చేయడం సురక్షితమని తెలిపింది.చివరి నిమిషం వరకు వేచి చూడకుండా వెంటనే తమ రిటర్నులను ఫైల్ చేయాలని ఆదాయపు పన్ను శాఖ సూచించింది. సోషల్ మీడియా ఎక్స్లో ఓ పోస్ట్ చేసింది. 'చివరి నిమిషం రద్దీ వరకు వేచి చూడవద్దు. ఆదాయపు పన్ను చట్టం 1961 ప్రకారం ఆడిట్ అవసరం లేని వ్యాపార, వృత్తిపరమైన ఆదాయం ఉన్నవారు ఐటీఆర్ 3,4,5,7 దాఖలు చేసేందుకు గడువు ఆగస్టు 31, 2026తో ముగుస్తోంది.' అని ఐటీ శాఖ స్పష్టం చేసింది.ఆగస్టు 31 దాటితే పెనాల్టీలుఆగస్టు 31 దాటినట్లయితే సెక్షన్ 234F కింద రూ.1000 నుంచి రూ.5000 వరకు లేట్ ఫీజు చెల్లించాల్సి వస్తుంది. ఉద్దేశపూర్వక ఆలస్యం వల్ల వడ్డీ భారం సెక్షన్ 234ఏ కింద భరించాల్సి వస్తుంది. అంటే ఒక్క రోజు ఆలస్యమైనా 3 నెలల వడ్డీ పడుతుందని గుర్తుంచుకోవాలి. అందుకే చివరి నిమిషంలోని రద్దీ వరకు వేచి చూసి ఇబ్బందులు పడకూడదని ఐటీ శాఖ సూచించింది.
