పిల్లల చిన్నచిన్న అలవాట్లను చాలామంది తల్లిదండ్రులు పెద్దగా పట్టించుకోరు. అయితే చిన్నతనంలో ఏర్పడిన కొన్ని అలవాట్లు భవిష్యత్తులో వారి ప్రవర్తన, వ్యక్తిత్వంపై ప్రభావం చూపే అవకాశం ఉంది.
ఇంటర్నెట్ డెస్క్: ఆచార్య చాణక్యుడి ప్రకారం.. కుటుంబ భవిష్యత్తును తీర్చిదిద్దడంలో పిల్లల పెంపకం ఎంతో కీలక పాత్ర పోషిస్తుంది. చిన్నతనంలో పిల్లలకు మంచి అలవాట్లు నేర్పించకపోతే, అవే భవిష్యత్తులో వారి వ్యక్తిత్వంపై ప్రభావం చూపే అవకాశం ఉంటుంది. ఇంట్లో చిన్న పిల్లలు ఉన్న తల్లిదండ్రులు వారి ప్రవర్తన, అలవాట్లను గమనిస్తూ ఉండాలి. పిల్లలు చేసే కొన్ని తప్పులను చిన్నవిగా భావించి వదిలేయకుండా, చిన్నతనంలోనే వాటి గురించి వారికి అర్థమయ్యేలా చెప్పడం మంచిది.
పిల్లలు మొదట చిన్న విషయాలకు అబద్ధాలు చెప్పడం ప్రారంభించవచ్చు. తిట్లు లేదా శిక్ష నుంచి తప్పించుకోవడానికి అబద్ధం చెప్పే అవకాశం ఉంటుంది. తల్లిదండ్రులు దాన్ని పట్టించుకోకుండా వదిలేస్తే, తప్పించుకోవడానికి అబద్ధం చెప్పడం సరైనదేనని పిల్లలు భావించే ప్రమాదం ఉంది.
క్రమంగా ఈ అలవాటు పెరిగితే అది వారి వ్యక్తిత్వంలో భాగమయ్యే అవకాశం ఉంటుంది. భవిష్యత్తులో వారు చెప్పే మాటలను ఇతరులు నమ్మడం కూడా కష్టమవుతుంది. అందుకే పిల్లలు అబద్ధం చెప్పినప్పుడు వెంటనే కోపంతో శిక్షించడం కంటే, నిజం చెప్పడం ఎందుకు ముఖ్యమో ప్రశాంతంగా వివరించడం మంచిది.
పిల్లలు కొంత మొండిగా ప్రవర్తించడం, చిన్న విషయాలకు కోపం తెచ్చుకోవడం సహజమే. అయితే అది అతిగా మారితే మాత్రం తల్లిదండ్రులు దృష్టి పెట్టాలి. తమకు కావాల్సిన వస్తువు దక్కకపోతే ఏడవడం, అరవడం, వస్తువులు విసరడం, పెద్దలతో వాదించడం వంటి ప్రవర్తనను ప్రతిసారీ సమర్థించడం మంచిది కాదు. పిల్లలు కోపం లేదా మొండితనంతో తమ కోరికలు నెరవేర్చుకోవచ్చని భావించే అవకాశం ఉంటుంది.
అందుకే పిల్లలు కోపంగా ఉన్నప్పుడు వారి మాటను అర్థం చేసుకుంటూనే, ప్రతి విషయంలో మొండిగా ప్రవర్తించడం సరైనది కాదని వారికి చెప్పాలి. చిన్నతనం నుంచే కోపాన్ని నియంత్రించుకోవడం నేర్పించాలి.
పిల్లలు పెద్దలతో, ఇంట్లో పనిచేసే వారితో లేదా తమకంటే చిన్నవారితో ఎలా మాట్లాడుతున్నారో తల్లిదండ్రులు గమనించాలి. ఎవరినైనా అమర్యాదగా మాట్లాడినా, అవమానించినా దాన్ని సరదాగా తీసుకోకూడదు. ఇతరులను గౌరవించడం, మర్యాదగా మాట్లాడడం, ఎదుటివారి భావాలను అర్థం చేసుకోవడం వంటి విలువలను చిన్నతనం నుంచే పిల్లలకు నేర్పించాలి. తల్లిదండ్రులు పిల్లల తప్పులను పదేపదే పట్టించుకోకుండా వదిలేస్తే, ఇతరులను అగౌరవపరచడం తప్పు కాదనే భావన వారికి కలగవచ్చు.
ఇతరుల వస్తువులను అనుమతి లేకుండా తీసుకోవడం
పిల్లలు కొన్నిసార్లు స్నేహితుల పెన్సిళ్లు, బొమ్మలు లేదా ఇతర వస్తువులను అనుమతి లేకుండా ఇంటికి తీసుకురావచ్చు. తల్లిదండ్రులు దీనిని చిన్న విషయం అనుకుని వదిలేయకూడదు. ఇతరుల వస్తువులను వారి అనుమతి లేకుండా తీసుకోవడం సరైనది కాదని పిల్లలకు స్పష్టంగా చెప్పాలి. అది తమకు నచ్చిన వస్తువైనా ముందుగా యజమాని అనుమతి తీసుకోవాలని నేర్పించాలి. చిన్న వయసులోనే ఈ విషయాన్ని అర్థం చేసుకునేలా చేస్తే మంచి అలవాట్లు ఏర్పడతాయి.
సమయాన్ని సరిగ్గా ఉపయోగించుకోవడం ప్రతి ఒక్కరికీ అవసరం. పిల్లలు చదువు, ఆటలు, నిద్ర వంటి రోజువారీ పనులను క్రమం లేకుండా చేస్తూ.. ఒక పని చేయాల్సిన సమయంలో మరో పని చేస్తూ ఉంటే తల్లిదండ్రులు దృష్టి పెట్టాలి. ‘ఈ రోజు చేయాల్సిన పని రేపు చేద్దాం’ అనే అలవాటు క్రమంగా సోమరితనానికి దారితీయవచ్చు. అందుకే పిల్లలకు చదువు, ఆటలు, భోజనం, నిద్రకు సరైన సమయాన్ని కేటాయిస్తూ ఒక క్రమబద్ధమైన దినచర్యను అలవాటు చేయాలి.
పిల్లలు చేసే ప్రతి తప్పుకూ శిక్షించడం పరిష్కారం కాదు. వారి ప్రవర్తన వెనుక కారణాన్ని అర్థం చేసుకుని, ఏది తప్పో.. ఎందుకు తప్పో వారికి అర్థమయ్యేలా చెప్పడం ముఖ్యం. చిన్నతనంలోనే నిజాయతీ, క్రమశిక్షణ, సమయపాలన, ఇతరుల పట్ల గౌరవం వంటి మంచి విలువలను నేర్పిస్తే అవి భవిష్యత్తులో కూడా వారికి ఉపయోగపడతాయి.
ప్రెషర్ కుక్కర్ విజిల్ వేస్తూ నీరు కారుతోందా? ఈ సింపుల్ చిట్కాలతో సమస్యకు చెక్
