ఫ్లోరిడాప్రైమరీలో భారత సంతతి మహిళ విజయం.. కాంగ్రెస్ రేసులో పియా దండియా
అమెరికా రాజకీయాల్లో భారత సంతతి వారు తమదైన ముద్ర వేస్తున్నారు. తాజాగా, ఫ్లోరిడాలోని 22వ కాంగ్రెషనల్ డిస్ట్రిక్ట్కు జరిగిన డెమోక్రటిక్ పార్టీ ప్రైమరీ ఎన్నికల్లో భారత సంతతి విద్యావేత్త పియా దండియా ఘన విజయం సాధించారు. మంగళవారం జరిగిన ఈ ఎన్నికల్లో ఆమె 61.3 శాతం ఓట్లతో తన సమీప ప్రత్యర్థి కేసియా ఇయర్లీపై గెలుపొందారు.ఈ విజయంతో, నవంబర్ 3న జరిగే సాధారణ ఎన్నికల్లో ఆమె రిపబ్లికన్ పార్టీ అభ్యర్థి, వ్యాపారవేత్త కాసే అస్కర్తో తలపడనున్నారు. ఏడుగురు పోటీపడిన రిపబ్లికన్ ప్రైమరీలో అస్కర్ విజయం సాధించారు. తన గెలుపుపై పియా దండియా హర్షం వ్యక్తం చేశారు. "నా సొంత రాష్ట్రమైన ఫ్లోరిడాలో డెమోక్రటిక్ నామినీగా నిలవడం చాలా థ్రిల్లింగ్గా, గౌరవంగా ఉంది. నాకు మద్దతుగా నిలిచిన ఓటర్లు, వాలంటీర్లకు హృదయపూర్వక ధన్యవాదాలు" అని ఆమె తన విజయ ప్రసంగంలో పేర్కొన్నారు.భారత్ నుంచి వలస వచ్చిన తల్లిదండ్రులకు ఫ్లోరిడాలోనే పియా జన్మించారు. ఉపాధ్యాయురాలిగా కెరీర్ ప్రారంభించి, 28 ఏళ్లకే ప్రిన్సిపల్గా బాధ్యతలు చేపట్టారు. ఆ తర్వాత వైట్హౌస్ ఫెలోగా, యాపిల్ సంస్థలోనూ పనిచేశారు. నవంబర్ ఎన్నికల్లో గెలిస్తే, ఫ్లోరిడా నుంచి అమెరికా కాంగ్రెస్కు ప్రాతినిధ్యం వహించిన తొలి దక్షిణాసియా అమెరికన్గా పియా చరిత్ర సృష్టిస్తారు.ఈ నియోజకవర్గం రిపబ్లికన్ పార్టీకి కొద్దిగా అనుకూలంగా ఉన్నప్పటికీ, హోరాహోరీ పోరు తప్పదని రాజకీయ విశ్లేషకులు అంచనా వేస్తున్నారు. అమెరికా ప్రతినిధుల సభలో మెజారిటీని నిర్ణయించే కీలక స్థానాల్లో ఇది కూడా ఒకటి కావడంతో ఇరు పార్టీలు ఈ సీటుపై ప్రత్యేక దృష్టి సారించాయి