Bhadradri Kothagudem News

ములకలపల్లి, సెప్టెంబర్ 02 : అత్యాచారానికి గురై హ‌త్య‌కు గురైన శిరీషా కుటుంబాన్నిఎంపీ వ‌ద్దిరాజు ర‌విచంద్ర బుధ‌వారం ప‌రామర్శించారు. పార్టీ అండగా ఉంటుందని భరోసానిచ్చారు. భద్రాద్రి కొత్తగూడెం జిల్లా ముల్కలపల్లి మండలం చౌటిగూడెంకు చెందిన ఊకే శిరీషా హైదరాబాద్ లోని ఒక ఆస్పత్రిలో నర్స్ గా పని చేస్తూ అత్యాచారానికి గురై హ‌త్య‌కు గురైన విషయం తెలిసిందే. కేటీఆర్ సూచనల మేరకు బీఆర్ఎస్ పార్లమెంటరీ పార్టీ లీడర్ వద్దిరాజు రవిచంద్ర, అశ్వారావుపేట మాజీ ఎమ్మెల్యే మెచ్చా నాగేశ్వరరావు బుధవారం చౌటిగూడెంలోని శిరీషా నివాసానికి వెళ్లి ఆమె చిత్రపటానికి పూల‌మాల వేసి శ్రద్ధాంజలి ఘటించారు. అనంత‌రం కేటీఆర్ కు ఫోన్ చేసి శిరీషా తల్లి రామలక్ష్మీ, సోదరుడు శివరాంలతో మాట్లాడించారు. పుట్టెడు దుఃఖంతో ఉన్న వారిని కేటీఆర్ ఓదార్చి పార్టీ అండగా ఉంటుందని భరోసానిచ్చారు. ఈ దారుణానికి ఒడిగట్టిన రాక్షసుడిని కఠినంగా శిక్షించడం ద్వారా తమకు న్యాయం చేయాల్సిందిగా శిరీషా వారు కోరగా కేటీఆర్ స్పందించి ఈ దారుణ ఘటన గురించి అసెంబ్లీలో లేవనెత్తి తప్పకుండా న్యాయం జరిగేలా చూస్తానని అభయమిచ్చారు.ఆపదలో ఉన్న మిమ్మల్ని ఓదార్చి మనోధైర్యాన్ని ఇవ్వడానికే రవిచంద్ర, నాగేశ్వరరావులు వచ్చారని,న్యాయం జరిగే వరకు మీ కుటుంబానికి బీఆర్ఎస్ అండగా ఉంటుందని కేటీఆర్ వారికి చెప్పారు.శిరీషా తల్లి రామలక్ష్మీకి ఎంపీ రవిచంద్ర 50వేల రూపాయల ఆర్థిక సాయం అందజేశారు. ఈ కార్య‌క్ర‌మంలో బీఆర్ఎస్ నాయకులు ఉప్పల వెంకటరమణ, కాపు సీతామహాలక్ష్మీ, సింధూ తపస్వి, ఉపాధ్యాయుల సూర్యప్రకాశరావు, మోరంపూడి అప్పారావు, పుష్పాల చందర్ రావు, మేకల వెంకటేశ్వర రావు, కొండవీటి రాజారావు, మేకల రాజేష్, గ్రామ సర్పంచ్ పద్మ పాల్గొన్నారు

చుంచుప‌ల్లి, సెప్టెంబ‌ర్ 02 : కోతుల బెడదను తక్షణమే పరిష్కరించకపోతే ఇకపై నిర్వహించే గ్రామసభలను బహిష్కరిస్తామని చుంచుపల్లి మండలం గౌతంపూర్ గ్రామ ప్రజలు హెచ్చరించారు. గ్రామంలో కోతుల సంఖ్య విపరీతంగా పెరిగి చిన్నారులు, మహిళలు, వృద్ధులు తీవ్ర భయాందోళనలకు గురవుతున్నారని తెలిపారు. ఇళ్లలోకి చొరబడి ఆహార పదార్థాలను తీసుకెళ్లడంతో పాటు వస్తువులను ధ్వంసం చేస్తున్నాయని ఆవేదన వ్యక్తం చేశారు. సమస్యను వెంటనే పరిష్కరించి కోతులను పట్టించి సురక్షిత ప్రాంతాలకు తరలించాలని కోరుతూ గ్రామసభలో సర్పంచ్‌ కళ్యాణి, సెక్రటరీ షర్మిల‌కు వినతిపత్రం అందజేశారు

ఇల్లెందు, సెప్టెంబర్ 02 : కాంగ్రెస్ ప్ర‌భుత్వ పాల‌న‌లో సామాన్యుల‌కు సంక్షేమం దూర‌మైంద‌ని ఇల్లెందు మాజీ ఎమ్మెల్యే హరిప్రియ నాయక్ అన్నారు. బీఆర్ఎస్ పార్టీ కార్యనిర్వాహక అధ్యక్షుడు కేటీఆర్ పిలుపు మేరకు కాంగ్రెస్ ప్రభుత్వ వెయ్యి రోజుల విఫల పాలనకు నిరసనగా ఇల్లెందులో 420 అడుగుల భారీ ప్లెక్సీతో పట్టణంలో ప్రదర్శన నిర్వహించారు. ఇల్లెందు బీఆర్ఎస్ పార్టీ నియోజకవర్గ కార్యాలయం నుండి మాజీ ఎమ్మెల్యే హరిప్రియ నాయక్ ఆధ్వర్యంలో కాంగ్రెస్ పార్టీ వెయ్యి రోజుల పరిపాలనపై రాష్ట్రంలో వారు చేస్తున్న వికృత చేష్టలను ప్రజలకు వివ‌రించేలా 420 అడుగుల ఫ్లెక్సీతో భారీ ర్యాలీతో జెకె బస్టాండ్ సెంటర్ నుండి జగదాంబ సెంటర్, పాత బస్టాండ్, బుగ్గ వాగు మీదుగా కొత్త బస్టాండ్ వరకు భారీ ర్యాలీ నిర్వహించారు. ఈ సందర్భంగా హరిప్రియ నాయక్ మాట్లాడుతూ... యువ నేత కేటీఆర్ పిలుపుమేరకు వారం రోజుల పాటు నిర్వహించబోయే సమరభేరి కార్యక్రమాలలో భాగంగా 420 అడుగుల భారీ ఫ్లెక్సీతో ప్రదర్శన కార్యక్రమం నిర్వహించామ‌న్నారు. రాష్ట్రంలో కాంగ్రెస్ పార్టీ పాలన ఎలా ఉంది అంటే బీఆర్ఎస్ కేసీఆర్ పాలనలో తెచ్చిన సంక్షేమ పథకాలన్నీ ఒకటి ఒకటిగా తొలగిస్తూ పేద, మధ్య తరగతి కుటుంబాలను ఇబ్బందులు పాలు చేస్తుందని ఆవేదన వ్యక్తం చేశారు. ప్రస్తుతం ఇల్లెందు ఎమ్మెల్యే ఇల్లెందులో చేసిన అభివృద్ధి ఏమి లేదని ఆమె అన్నారు. మహబూబాబాద్ మాజీ జడ్పీ చైర్ పర్సన్ బిందు మాట్లాడుతూ.. కేసీఆర్‌ సంక్షేమ పథకాలను కాంగ్రెస్ ప్రభుత్వం తీసియటమే పనిగా ముందుకు సాగుతుంది. రైతు బీమా డబ్బులు ప్రీమియం కట్టక రైతు బీమా పథకం ఆగిపోతుందని రాష్ట్రంలో కాంగ్రెస్ పాలనపై ప్రజలు విసుకు చెందుతున్నారని అన్నారు. ఈ కార్యక్రమంలో బీఆర్ఎస్ పార్టీ రాష్ట్ర నాయకులు బానోత్ హరి సింగ్ నాయక్, మున్సిపాలిటీ 13వ వార్డు కౌన్సిలర్ దండు సారయ్య, బీఆర్ఎస్ పార్టీ ముఖ్య నాయకులు సిలివేరి సత్యనారాయణ, దాస్యం ప్రమోద్, జెకె శీను,లకావత్

రామ‌వ‌రంలో డ్రైనేజీ పనులకు అడ్డంగా విద్యుత్ స్తంభాలు రుద్రంపూర్, సెప్టెంబర్ 02 : రామవరం జాతీయ రహదారి పక్కన డ్రైనేజీ నిర్మాణ పనులు ఇప్పుడు అధికారుల ప్రణాళికా లోపానికి అద్దం పడుతున్నాయనే విమర్శలు వ్యక్తమవుతున్నాయి. ఎన్నో ఏళ్లుగా స్థానిక ప్రజలు చేసిన వినతుల అనంతరం ఎట్టకేలకు డ్రైనేజీ నిర్మాణానికి కార్పొరేషన్ శ్రీకారం చుట్టడం స్వాగతించదగిన విషయమే అయినప్పటికీ, నిర్మాణ మార్గం మధ్యలో విద్యుత్ స్తంభాలు అడ్డంకిగా నిలవడం అధికారుల ముందుచూపుపై తీవ్ర ప్రశ్నలు లేవనెత్తుతోంది. ప్రజా సౌకర్యం కోసం చేపట్టిన డ్రైనేజీ పనులకు విద్యుత్ స్తంభాలే అడ్డుగా మారడంతో, ముందుగా ప్రణాళిక ఎవరు రూపొందించారు? శాఖల మధ్య సమన్వయం ఎందుకు జరగలేదు? అనే ప్రశ్నలు స్థానికుల నుంచి వినిపిస్తున్నాయి. నాలుగు మీటర్ల లోతులో కాలువ‌.. ఐదు మీటర్ల స్తంభానికి మిగిలేది ఎంత? విద్యుత్ స్తంభాలను సాధారణంగా సుమారు ఐదు మీటర్ల లోతులో పాతుతారని, డ్రైనేజీ నిర్మాణం కోసం సుమారు నాలుగు మీటర్ల లోతు వరకు తవ్వకాలు చేపడితే స్తంభాల పునాదికి అత్యంత తక్కువ భూమి మాత్రమే మిగిలే అవకాశం ఉందని స్థానికులు, అనుభవజ్ఞులు ఆందోళన వ్యక్తం చేస్తున్నారు. ఇప్పటికే స్తంభాలకు సరైన రక్షణ చర్యలు తీసుకోకుండా భూమిలో ఏర్పాటు చేసి పైభాగంలో విద్యుత్ లైన్లు లాగారని ఆరోపణలు వస్తున్నాయి. డ్రైనేజీ కోసం భారీగా తవ్వకాలు చేపట్టిన నేపథ్యంలో స్తంభాల స్థిరత్వంపై సందేహాలు వ్యక్తమవుతున్నాయి. ఈ ప్రాంతంలో సింగరేణి యాజమాన్యం 33 కేవీ విద్యుత్ లైన్‌ను ఏర్పాటు చేసి, భారీ ఇనుప నిర్మాణాలతో కూడిన స్తంభాలను ఏర్పాటు చేసినట్లు రామవరం పరిరక్షణ కమిటీ పేర్కొంది. డ్రైనేజీ తవ్వకాల కారణంగా సమీపంలోని విద్యుత్ స్తంభాలు బలహీనపడి, అనుకోని పరిస్థితుల్లో వంగినా లేదా నేలకు ఒరిగినా, సమీపంలోని సింగరేణి విద్యుత్ నిర్మాణాలపై ప్రభావం పడే ప్రమాదం ఉందని ఆందోళన వ్యక్తం చేసింది. ఇలాంటి ప్రమాదం సంభవిస్తే కేవలం విద్యుత్ సరఫరాపైనే కాకుండా, సింగరేణి బొగ్గు ఉత్పత్తి కార్యకలాపాలపైనా

డీఎస్పీ గొర్రె మధు దాతృత్వాన్ని కొనియాడిన ఉపాధ్యాయులు జూలూరుపాడు, సెప్టెంబర్ 01 : తాము చదువుకున్న పాఠశాల అభివృద్ధికి సహకరిస్తూ, విద్యార్థుల కష్టాలను తీర్చేందుకు పూర్వ విద్యార్థులు ముందుకురావడం అభినందనీయమని జూలూరుపాడు ప్ర‌భుత్వ‌ పాఠశాల ప్రధానోపాధ్యాయులు లక్ష్మీ నరసయ్య అన్నారు. జూలూరుపాడు ప్రభుత్వ ఉన్నత పాఠశాలలో 6వ తరగతి నుండి 10వ తరగతి వరకు చదివి, సాంఘిక సంక్షేమ వసతి గృహంలో ఉంటూ విద్యాభ్యాసం పూర్తి చేసిన పూర్వ విద్యార్థి, ప్రస్తుత మంచిర్యాల డీఎస్పీ గొర్రె మధు తన తల్లిదండ్రులు దివంగత గొర్రె నరసయ్య - బాలమ్మ జ్ఞాపకార్థం పాఠశాలకు సుమారు రూ.1,20,000 విలువైన సామగ్రిని విరాళంగా మంగళవారం అందజేశారు. [caption id="attachment_2499841" align="alignnone" width="1200"] పాఠశాలకు పూర్వ విద్యార్థి రూ.1.20 ల‌క్ష‌ల విలువైన సామ‌గ్రి అంద‌జేత[/caption] ఇందులో భాగంగా విద్యార్థుల తాగునీటి అవసరాల కోసం ఆర్వో వాటర్ ప్యూరిఫైయర్ ప్లాంట్, తరగతి గదుల్లో కూర్చోవడానికి 20 బెంచీలు, అలాగే పాఠశాల కార్యాలయ పనులు, విద్యార్థుల ఆన్‌లైన్ డేటా ఎంట్రీ, స్కాలర్‌షిప్‌లు ఆధార్ అనుసంధాన ప్రక్రియల కోసం ల్యాప్‌టాప్ ప్రింటర్‌ను సమకూర్చారు. ఈ సందర్భంగా పాఠశాల ప్రధానోపాధ్యాయులు, ఉపాధ్యాయ బృందం, ఎస్‌ఎంసీ చైర్‌పర్సన్ మాట్లాడుతూ.. ఉన్నత స్థానానికి చేరుకున్నా మూలాలను మర్చిపోకుండా, పేద విద్యార్థుల అవసరాలను గుర్తించి పెద్ద మనసుతో చేయూతనిచ్చిన డీఎస్పీకి ప్రత్యేక ధన్యవాదాలు, కృతజ్ఞతలు తెలియజేశారు. ఈ కార్యక్రమంలో పాఠశాల ఉపాధ్యాయులు, సిబ్బంది, గ్రామస్తులు విద్యార్థులు పాల్గొన్నారు. [caption id="attachment_2499842" align="alignnone" width="1200"] పాఠశాలకు పూర్వ విద్యార్థి రూ.1.20 ల‌క్ష‌ల విలువైన సామ‌గ్రి అంద‌జేత[/caption]

జూలూరుపాడు మండలంలో పారిశుధ్య కార్మికులకు కనీస రక్షణ పరికరాలు క‌రువు - చేతులకు ప్లాస్టిక్ కవర్లు చుట్టుకుని చెత్త ఎత్తుతున్న దుస్థితి - వర్షాకాలంలో అంటువ్యాధుల ముప్పు.. పట్టించుకోని అధికార యంత్రాంగం జూలూరుపాడు, సెప్టెంబర్ 01 : గ్రామాల్లో పారిశుధ్య పరిరక్షణ కోసం గత ప్రభుత్వం ప్రవేశపెట్టిన పటిష్టమైన చర్యలను కాంగ్రెస్ ప్రభుత్వం పూర్తిగా గాలికొదిలేసిందన్న విమర్శలు తీవ్రస్థాయిలో వెల్లువెత్తుతున్నాయి. గత బీఆర్ఎస్ హయాంలో పల్లె ప్రగతి ద్వారా ప్రతి గ్రామ పంచాయతీకి ప్రత్యేక ట్రాక్టర్లు, ట్రాలీలు సమకూర్చి చెత్తను నేరుగా డంపింగ్ యార్డులకు తరలించే వ్యవస్థను తెచ్చారు. అదే క్రమంలో పారిశుధ్య కార్మికుల శ్రమను గౌరవిస్తూ, వారి ఆరోగ్య భద్రత కోసం నాణ్యమైన గ్లౌజులు, మాస్కులు, గమ్ బూట్లు, యూనిఫామ్‌లతో పాటు నిత్యం సబ్బులు, కొబ్బరి నూనె, శానిటైజర్లను క్రమం తప్పకుండా పంపిణీ చేసేవారు. కానీ, నేడు పాలకులు మారడంతో పంచాయతీల్లో పారిశుధ్య వ్యవస్థ గాడి తప్పి, కార్మికుల సంక్షేమం ప్రశ్నార్థకంగా మారింది. రక్షణ కవచం లేక పారిశుధ్య కార్మికుల‌ విలవిల జూలూరుపాడు మండల పరిధిలోని 24 గ్రామ పంచాయతీల్లో మొత్తం 83 మంది పారిశుధ్య కార్మికులు విధులు నిర్వహిస్తున్నారు. ప్రస్తుతం ముసురు పట్టి వర్షాలు కురుస్తున్న వేళ, మురుగు కాల్వలు, చెత్తాచెదారాలను శుభ్రం చేయడానికి అవసరమైన కనీస భద్రతా సామగ్రిని అధికారులు సమకూర్చడం లేదు. గ్లౌజులు, కాళ్లకు బూట్లు, ముఖానికి మాస్కులు లేకపోవడంతో కార్మికులు తీవ్ర ఇబ్బందులు పడుతున్నారు. వేరే ప్రత్యామ్నాయం లేక స్థానిక దుకాణాల్లో లభించే చిత్తు ప్లాస్టిక్ కవర్లను చేతులకు చుట్టుకుని, ప్రమాదకరమైన వ్యర్థాలను ఎత్తిపారేయాల్సిన దుస్థితి దాపురించింది. వర్షాకాలంలో అంటువ్యాధులు ప్రబలే ప్రమాదం ఎక్కువగా ఉన్న సమయంలో, కనీసం చేతులు కడుక్కోవడానికి సబ్బులు, శానిటైజర్లు కూడా ఇవ్వకపోవడం అధికారుల నిర్లక్ష్యానికి నిదర్శనమని కార్మిక సంఘాలు మండిపడుతున్నాయి. గాజు పెంకులు, సూదులు, కుళ్లిన వ్యర్థాలను చేతులతోనే తాకడం వల్ల తీవ్రమైన చర్మవ్యాధులు, ఇన్ఫెక్షన్ల బారిన పడే ప్రమాదం

తెలంగాణలో మరో విమానాశ్రయం నిర్మాణానికి కేంద్రం సిద్ధమవుతోంది. భద్రాద్రి కొత్తగూడెం జిల్లాలో కొత్త ఎయిర్‌పోర్ట్ ఏర్పాటు చేయాలని కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు స్పష్టం చేశారు. భద్రాచలం శ్రీ సీతారామచంద్రస్వామి దేవస్థానం ఉన్న ఈ ప్రాంత ప్రజల సౌకర్యార్థం తప్పకుండా విమానాశ్రయం నిర్మించాలని అధికారులను ఆదేశించారు.భద్రాద్రి కొత్తగూడెంలో ఎయిర్పోర్ట్ స్థల పరిశీలనకు రానున్న కేంద్ర సాంకేతిక బృందంఈ మేరకు నాలుగు నుంచి ఐదు ప్రత్యామ్నాయ స్థలాలను పరిశీలించేందుకు కేంద్ర సాంకేతిక బృందం సెప్టెంబర్ 7న తెలంగాణలో పర్యటించనుందని మంత్రి వెల్లడించారు. రాష్ట్ర మంత్రి తుమ్మల నాగేశ్వరరావు కేంద్ర మంత్రితో భేటీ అయి, గతంలో పరిశీలించిన రెండు స్థలాలు సాంకేతిక కారణాలతో అనుకూలం కాకపోవడంతో కొత్తగా గుర్తించిన స్థలాల వివరాలు తెలిపారు.నివేదిక అనుకూలంగా వస్తే కేంద్ర ప్రభుత్వం తదుపరి చర్యలుకొత్త స్థలాల్లో భౌగోళిక, వాతావరణ పరిస్థితులు, విమానాశ్రయ నిర్మాణానికి అవసరమైన సాంకేతిక అంశాలను బృందం క్షేత్రస్థాయిలో పరిశీలించనుంది. వారి నివేదిక అనుకూలంగా వస్తే కేంద్ర ప్రభుత్వం తదుపరి చర్యలు చేపడుతుందని తెలిపారు. ఎయిర్‌పోర్ట్ ఏర్పాటుకు సాంకేతిక బృందాన్ని పంపించేందుకు చొరవ తీసుకున్న కేంద్ర మంత్రి రామ్మోహన్ నాయుడికి, కేంద్ర ప్రభుత్వానికి మంత్రి తుమ్మల నాగేశ్వరరావు ధన్యవాదాలు తెలిపారు.ఈ ప్రాజెక్ట్ తీర్ధ యాత్రికులకే కాదు ప్రాంత అభివృద్ధికి కీలకం ఈ ప్రాజెక్టు భద్రాచలం తీర్థయాత్రికులు, స్థానిక ప్రజలకు గొప్ప ఉపయోగం చేకూర్చనుంది.సింగరేణి పారిశ్రామిక ప్రాంతంతో పాటు ప్రసిద్ధ పుణ్యక్షేత్రమైన భద్రాచలం రామాలయం సందర్శనకు వచ్చే భక్తులకు, వ్యాపారవేత్తలకు ఈ విమానాశ్రయం అందుబాటులోకి వస్తే ఎంతో మేలు జరుగుతుంది. రవాణా సౌకర్యాలు మెరుగై, ఈ ప్రాంత సమగ్ర ఆర్థిక పురోగతికి బాటలు పడతాయని భావిస్తున్నారు.తెలంగాణలో కొత్త ఎయిర్ పోర్ట్ ల నిర్మాణానికి కేంద్ర సహకారం తెలంగాణా రాష్ట్రంలో కొత్త ఎయిర్ పోర్ట్ ల నిర్మాణానికి కేంద్రం నుండి సహకారం లభిస్తోంది, ఇప్పటికే వరంగల్ మామునూరు ఎయిర్పోర్ట్ నిర్మాణానికి సంబంధించిన భూసేకరణ పూర్తి చేసి

Palvancha: బాబు జగ్జీవన్ రామ్ విగ్రహ ఆవిష్కరణ బహిష్కరణ - మాదిగ నేతలు ఈ వార్తకు సంబంధించిన

– మెడికల్ బోర్డు కోసం ఎదురుచూస్తున్న కార్మికులను 100 శాతం అన్‌ఫిట్ చేయాలి – టీబీజీకేఎస్ ఆధ్వర్యంలో నల్ల బ్యాడ్జీలతో నిరసన – కార్మిక కుటుంబాల భవిష్యత్‌తో చెలగాటమాడొద్దు : కాపు కృష్ణ రుద్రంపూర్, సెప్టెంబర్ 01 : సింగరేణిలో అనారోగ్యంతో బాధపడుతూ మెడికల్ బోర్డు కోసం దరఖాస్తు చేసుకుని ఎదురుచూస్తున్న కార్మికుల సమస్యలను వెంటనే పరిష్కరించాలని తెలంగాణ బొగ్గు గని కార్మిక సంఘం (టీబీజీకేఎస్) డిమాండ్ చేసింది. ప్రతి నెల క్రమం తప్పకుండా కనీసం మూడు మెడికల్ బోర్డులను నిర్వహించి, మెడికల్ బోర్డుకు దరఖాస్తు చేసుకున్న అర్హులైన కార్మికులందరికీ న్యాయం చేయాలని కోరుతూ మంగళవారం నల్ల బ్యాడ్జీలు ధరించి నిరసన కార్యక్రమం నిర్వహించారు. కొత్తగూడెం ఏరియా పరిధిలోని ఉద్యోగులు టీబీజీకేఎస్ నాయకుడు గడప రాజయ్య ఆధ్వర్యంలో నల్ల బ్యాడ్జీలు ధరించి నిరసన తెలిపారు. సుదీర్ఘకాలంగా మెడికల్ బోర్డు కోసం ఎదురు చూస్తున్న కార్మికుల ఆవేదనను యాజమాన్యం, ప్రభుత్వం గుర్తించాలని, వారి ఆరోగ్య పరిస్థితి, కుటుంబాల భవిష్యత్‌ను దృష్టిలో ఉంచుకుని తక్షణమే మెడికల్ బోర్డుల నిర్వహణను క్రమబద్ధీకరించాలని నాయకులు డిమాండ్ చేశారు. ఈ సందర్భంగా టీబీజీకేఎస్ రాష్ట్ర ముఖ్య ప్రధాన కార్యదర్శి కాపు కృష్ణ మాట్లాడుతూ.. సింగరేణిలో 1998లో రద్దు చేసిన డిపెండెంట్ ఉద్యోగాల స్థానంలో అప్పటి ముఖ్యమంత్రి కేసీఆర్ హయాంలో కారుణ్య నియామకాలను ప్రవేశపెట్టారని తెలిపారు. ఈ విధానం ద్వారా వేలాది కార్మిక కుటుంబాలకు ఉపాధి అవకాశాలు లభించాయని పేర్కొన్నారు. కారుణ్య నియామకాల అమలులో భాగంగా 14 వేల మందికి పైగా కార్మికులు మెడికల్ ఇన్‌వ్యాలిడేట్ కావడం ద్వారా వారి కుటుంబాల్లోని అర్హులకు ఉద్యోగ అవకాశాలు కల్పించబడటంతో అనేక కుటుంబాలకు న్యాయం జరిగిందని వివరించారు. బీఆర్‌ఎస్ ప్రభుత్వ హయాంలో మెడికల్ బోర్డుకు దరఖాస్తు చేసుకున్న కార్మికుల్లో 80 శాతానికి పైగా అన్‌ఫిట్ అవుతున్నారని, నెలకు రెండు మెడికల్ బోర్డులు మాత్రమే నిర్వహిస్తున్నారని అప్పట్లో కాంగ్రెస్ పార్టీతో పాటు ఏఐటీయూసీ, ఐఎన్‌టీయూసీ కార్మిక సంఘాలు

– శుభకార్యాల నిర్వహణలో తప్పని ఇబ్బందులు – సింగ‌రేణి అధికారుల నిర్లక్ష్యంపై కార్మికుల ఆగ్రహం రుద్రంపూర్, సెప్టెంబర్ 01 : కార్మిక కుటుంబాల్లో జరిగే శుభకార్యాలకు ఆనందాల వేదికగా ఉండాల్సిన కమ్యూనిటీ హాల్ ప్రస్తుతం నత్తల సమస్యతో నిర్వాహకులకు తలనొప్పిగా మారింది. శుభకార్యానికి వచ్చే అతిథుల కంటే కమ్యూనిటీ హాల్లో కనిపించే నత్తల సంఖ్యే ఎక్కువగా ఉంటోందంటూ శుభకార్యం నిర్వహించుకునే నిర్వాహకులు, కార్మిక కుటుంబాలు తీవ్ర ఆవేదన వ్యక్తం చేస్తున్నారు. సింగరేణి కొత్తగూడెం ఏరియా పరిధిలోని గౌతంపూర్ ప్రాంతంలో కార్మికుల ఇళ్లలో జరిగే వివాహాలు, నిశ్చితార్థాలు, ఇతర కుటుంబ శుభకార్యాల నిర్వహణ కోసం సింగరేణి యాజమాన్యం కమ్యూనిటీ హాల్‌ను ఏర్పాటు చేసింది. అయితే, ప్రస్తుతం ఈ కమ్యూనిటీ హాల్‌లో నెలకొన్న పరిస్థితులు శుభకార్యాల నిర్వాహకులను తీవ్ర ఇబ్బందులకు గురిచేస్తున్నాయి. కమ్యూనిటీ హాల్ పరిసర ప్రాంతంలో అధికంగా చెమ్మ ఉండటమే నత్తలు పెరగడానికి ప్రధాన కారణమని స్థానికులు, నిర్వాహకులు చెబుతున్నారు. హాల్ చుట్టుపక్కల ప్రాంతంలో నీరు నిల్వ ఉండటం, తేమ ఎక్కువగా ఉండటం వల్ల నత్తలు విపరీతంగా పెరిగి హాల్‌లోకి చేరుతున్నాయని అంటున్నారు. ముఖ్యంగా వర్షాకాలంలో పరిస్థితి మరింత తీవ్రంగా మారుతోందని ఆవేదన వ్యక్తం చేస్తున్నారు. గోడలు, నేల, మూలలు, డ్రైనేజీ ప్రాంతాలు ఇలా ఎక్కడ చూసినా నత్తలు కనిపిస్తుండటంతో కమ్యూనిటీ హాల్‌కు వచ్చే వారు అసహనం వ్యక్తం చేస్తున్నారు. అయితే కమ్యూనిటీ హాల్ పరిసర ప్రాంతంలో పేరుకుపోతున్న చెమ్మను తొలగించి, నీరు నిల్వ ఉండకుండా తగిన డ్రైనేజీ వ్యవస్థను ఏర్పాటు చేస్తే నత్తల సమస్యకు శాశ్వత పరిష్కారం లభించే అవకాశం ఉందని సూచిస్తున్నారు. హాల్ చుట్టుపక్కల ఉన్న తేమను తగ్గించి, పరిసరాలను ఎప్పటికప్పుడు పరిశుభ్రంగా ఉంచడం ద్వారా నత్తల పెరుగుదలను అరికట్టవచ్చని అంటున్నారు. ఇప్ప‌టికైనా సింగరేణి అధికారులు స్పందించి ఆ దిశ‌గా చ‌ర్య‌లు తీసుకోవాల‌ని కోరుతున్నారు

మణుగూరు గ్యాంగ్‌వార్‌ హత్య కేసు ఛేదింపు.. 27 మంది నిందితులు అరెస్ట్ భద్రాద్రి కొత్తగూడెం జిల్లా మణుగూరులో సంచలనం సృష్టించిన గ్యాంగ్‌వార్ హత్య కేసును పోలీసులు ఛేదించారు. మణుగూరు నేతాజీ గ్రౌండ్‌లో ఈ నెల 27న జరిగిన శివ హత్య కేసులో మొత్తం 27 మందిని నిందితులుగా గుర్తించినట్లు పోలీసులు తెలిపారు. రాఖీ పండుగ కోసం ఇంటికి వచ్చిన శివను, ఎం.కే గ్యాంగ్ సభ్యులు మాట్లాడాలని చెప్పి నేతాజీ గ్రౌండ్‌కు పిలిచారు. అక్కడ ఇరువర్గాల మధ్య జరిగిన వ్యక్తిగత గొడవలే ఈ హత్యకు ప్రధాన కారణమని పోలీసులు తేల్చారు. గ్రూప్‌లోని సభ్యులు విచక్షణారహితంగా దాడి చేయడంతో శివ ప్రాణాలు కోల్పోయాడు. నిందితులంతా మణుగూరు స్థానికులేనని, కేవలం పార్టీల పేరుతో గ్రూపులు ఏర్పాటు చేసుకుని ఇటువంటి అసాంఘిక కార్యకలాపాలకు పాల్పడుతున్నట్లు పోలీసులు విచారణలో గుర్తించారు. అయితే, నిందితులు గంజాయి వంటి మాదకద్రవ్యాలు తీసుకుంటున్నట్లు విచారణలో ఎలాంటి ఆధారాలు లభించలేదని డీఎస్పీ వంగా రవీందర్ రెడ్డి స్పష్టం చేశారు. ఈ వార్తకు సంబంధించిన

– నా ఏరియాలో నా అనుమతి లేకుండా కార్యక్రమాలు చేస్తే సహించేది లేదంటూ హెచ్చరిక చుంచుపల్లి, ఆగ‌స్టు 31 : ప్రభుత్వ పాఠశాలలో మధ్యాహ్న భోజనం వంటకు వినియోగించే నీటిలో బల్లి పడిన ఘటనను నిరసిస్తూ పాఠశాల ఎదుట ఆందోళన చేపట్టిన ఏఐవైఎఫ్ భ‌ద్రాద్రి కొత్త‌గూడెం జిల్లా సీపీఐ కార్యదర్శి ఎస్కే ఫైవ్ దాదాపై అలాగే 27వ డివిజన్ కార్పొరేటర్ మధ్యల హరితపై సీపీఐ నాయకుడు దుర్గరాశి వెంకన్న దౌర్జన్యం చేశారు. విద్యార్థుల ఆరోగ్య భద్రతను దృష్టిలో ఉంచుకుని ఘటనపై నిరసన తెలుపుతున్న ఏఐవైఎఫ్ నాయకులను అక్కడి నుండి వెళ్లిపోవాలని వెంకన్న బలవంతం చేసినట్లు ఆందోళనకారులు తెలిపారు. అంతేకాకుండా “నా ఏరియాలో నా అనుమతి లేకుండా ఆందోళనలు చేస్తే సహించేది లేదు” మీ పదవులను కూడా పీకిచ్చేస్తా అంటూ హెచ్చరించినట్లు చెప్పారు. ఈ ఘటనతో పాఠశాల వద్ద కొద్దిసేపు ఉద్రిక్త పరిస్థితి నెలకొంది. విద్యార్థులకు అందించే మధ్యాహ్న భోజనం విషయంలో నిర్లక్ష్యంపై ప్రశ్నిస్తే అడ్డుకోవడం ఎంతవరకు సమంజసమని ఏఐవైఎఫ్ నాయకులు ప్రశ్నించారు. విద్యార్థుల ఆరోగ్యానికి సంబంధించిన అంశంపై ప్రజాస్వామ్య పద్ధతిలో నిరసన తెలిపే హక్కును ఎవరూ అడ్డుకోరాదని వారు పేర్కొన్నారు. కాగా, ఈ విషయాన్ని ఏఐవైఎఫ్ జిల్లా కార్యదర్శి ఎస్.కె ఫైయిం దాదా మాట్లాడుతూ.. త‌మ‌పై చేసిన దౌర్జన్యంను త‌మ‌ రాష్ట్ర అధ్యక్షుడు వలీల్లా కాత్రేయ, రాష్ట్ర కార్యదర్శి కల్లూరి ధర్మేందర్, ఎమ్మెల్యే కూనంనేని సాంబశివరావు, సీపీఐ జిల్లా కార్యదర్శి షాబీర్ పాషా దృష్టికి తీసుకెళ్లినట్లు తెలిపారు. ఈ ప్రాంతంలో తన అనుమతి లేకుండా ఎలాంటి కార్యక్రమాలు నిర్వహించరాదని, ఏఐవైఎఫ్ నాయకులపై అదేవిధంగా కార్పొరేటర్ పై సిపిఐ నాయకుడు దుర్గరాసి వెంకన్న దుర్భాషలాడుతూ దురుసుగా ప్రవర్తించాడని పేర్కొన్నారు. పాఠశాలలో జరిగిన ఘటన అదే సమయంలో నిరసనకారులపై దౌర్జన్యానికి పాల్పడిన వారిపై చర్యలు తీసుకోవాలని కోరారు

రుద్రంపూర్, ఆగస్టు 31 : సింగరేణి సంస్థలో అధికారులు (ఎగ్జిక్యూటివ్‌లు), ఉద్యోగులు(ఎన్‌సీడబ్ల్యూఏ) ఉద్యోగులందరికీ ప్రతి సంవత్సరం తప్పనిసరిగా పీరియాడికల్ మెడికల్ ఎగ్జామినేషన్ (పీఎంఈ) నిర్వహించాలని కార్పొరేట్ సేఫ్టీ విభాగం జారీ చేసిన తాజా సర్క్యులర్ కార్మికుల్లో భయాందోళనలకు దారితీస్తోంది. ముఖ్యంగా 45 సంవత్సరాలు దాటిన ఉద్యోగులకు గతంలో రెండున్నర సంవత్సరాలకు ఒకసారి, 45 సంవత్సరాలు లోపు ఉన్నవారికి ఐదు సంవత్సరాలకు ఒకసారి పీఎంఈ నిర్వహించే విధానం ఉండగా, ఇప్పుడు వయసుతో సంబంధం లేకుండా అందరికీ సంవత్సరానికి ఒకసారి వైద్య పరీక్షలు నిర్వహించాలంటూ ఆదేశాలు రావడం చర్చనీయాంశంగా మారింది. ఈ మేరకు కార్పొరేట్ సేఫ్టీ విభాగం ఆగస్టు 28, 2026న అన్ని ఏరియా జనరల్ మేనేజర్లు, కార్పొరేట్ జీఎంలు, హెచ్‌వోడీలకు సర్క్యులర్ జారీ చేసింది. గతంలో నిర్ణయించిన షెడ్యూల్ ప్రకారం కొంతమంది ఉద్యోగులు పీఎంఈలకు హాజరు కాలేదని పేర్కొన్న అధికారులు, ఓ ఎస్ హెచ్ ఓ ఎస్ హెచ్& డబ్ల్యూ సి సెంట్రల్ నిబంధన ప్రకారం-2026 లోని రూల్ 60 ప్రకారం ప్రతి ఉద్యోగి సంవత్సరానికి ఒకసారి పీరియాడికల్ మెడికల్ ఎగ్జామినేషన్ చేయించుకోవడం తప్పనిసరి అని స్పష్టం చేశారు. దీంతో తమ ఆరోగ్య పరిస్థితులకు సంబంధించి వైద్య పరీక్షల్లో ఏవైనా సమస్యలు తలెత్తితే ఉద్యోగ భద్రత, విధుల నిర్వహణపై ఎలాంటి ప్రభావం ఉంటుందోనన్న ఆందోళన కార్మికుల్లో వ్యక్తమవుతోంది. ముఖ్యంగా వయోభారం పెరుగుతున్న ఉద్యోగుల్లో ఈ ఆందోళన మరింత కనిపిస్తోంది. ఈ నేపథ్యంలో సింగరేణిలో గుర్తింపు, ప్రాతినిధ్యం వహిస్తున్న కార్మిక సంఘాలు స్పందించి పీఎంఈ విధానం వల్ల కార్మికులకు ఎటువంటి ఇబ్బందులు కలగకుండా చూడాలని ఉద్యోగులు కోరుతున్నారు. సంవత్సరానికి ఒకసారి వైద్య పరీక్షలు నిర్వహించడం వెనుక ఉన్న నిబంధనలు, పరీక్షల విధానం, ఆరోగ్య సమస్యలు గుర్తించిన సందర్భంలో ఉద్యోగులపై పడే ప్రభావం వంటి అంశాలపై యాజమాన్యంతో చర్చించి కార్మికులకు స్పష్టమైన భరోసా కల్పించాల్సిన అవసరం ఉందని కార్మికులు అభిప్రాయపడుతున్నారు. కార్మికుల ఆరోగ్య పరిరక్షణ పేరుతో చేపట్టే పీఎంఈ

బీఆర్‌ఎస్‌వీ భ‌ద్రాద్రి కొత్త‌గూడెం జిల్లా నాయకుడు జూపెల్లి దుర్గాప్రసాద్ రుద్రంపూర్, ఆగస్టు 22 : పాలిటెక్నిక్ విద్యార్థుల భవిష్యత్‌ను దృష్టిలో ఉంచుకుని కాంగ్రెస్ ప్రభుత్వం జీవో నంబర్‌ 97ను తక్షణమే రద్దు చేయాలని బీఆర్‌ఎస్‌వీ భ‌ద్రాద్రి కొత్త‌గూడెం జిల్లా నాయకుడు జూపెల్లి దుర్గాప్రసాద్ డిమాండ్ చేశారు. శనివారం కొత్తగూడెం ప్రభుత్వ పాలిటెక్నిక్ కళాశాల ప్రాంగణంలో బీఆర్‌ఎస్‌వీ ఆధ్వర్యంలో జీవో 97కు వ్యతిరేకంగా నిర్వహించిన నిరసనలో ఆయన పాల్గొని మాట్లాడారు. జీవో 97 ద్వారా పాలిటెక్నిక్, డిప్లొమా కోర్సులను శక్తి విభాగం, యంగ్ ఇండియా స్కిల్ యూనివర్సిటీ పరిధిలోకి తీసుకురావాలని ప్రభుత్వం ప్రతిపాదించిందన్నారు. దీంతో రాష్ట్రంలోని సుమారు 75 వేల మంది పాలిటెక్నిక్ విద్యార్థుల భవిష్యత్తుపై ప్రభావం పడే అవకాశం ఉందన్నారు. పాలిటెక్నిక్ విద్యను ప్రభుత్వ-ప్రైవేట్ భాగస్వామ్య (PPP) విధానంలోకి తీసుకెళ్లడం, స్టేట్ బోర్డ్ ఆఫ్ టెక్నికల్ ఎడ్యుకేషన్ అండ్ ట్రైనింగ్ (SBTET) స్వయం ప్రతిపత్తిని దెబ్బతీసే చర్యగా ఆయన అభివర్ణించారు. అలాగే డిప్లొమా విద్యార్థులకు ఉన్న ECET ద్వారా బీటెక్‌లో లాటరల్ ఎంట్రీ అవకాశాలపై కూడా ప్రభావం పడే ప్రమాదం ఉందని ఆందోళన వ్యక్తం చేశారు. సాంకేతిక డిప్లొమా విద్యా ప్రమాణాలను కాపాడాల్సిన బాధ్యత ప్రభుత్వంపై ఉందన్నారు. జీవో 97ను వెంటనే నిలిపివేయకపోతే విద్యార్థుల పక్షాన రాష్ట్రవ్యాప్తంగా పెద్ద ఎత్తున ఉద్యమం చేపడతామని హెచ్చరించారు. ఈ కార్యక్రమంలో గూడెల్లి ముఖేష్, వాసు, మల్ల గౌతమ్, రవితేజ, నజీర్, సన్నీ పాల్గొన్నారు. [caption id="attachment_2491216" align="alignnone" width="1200"] 'జీవో 97ను తక్షణమే రద్దు చేయాలి.. లేదంటే పెద్ద ఎత్తున ఉద్యమం'[/caption]

– సార‌పాక జ‌డ్పీహెచ్ఎస్‌ పూర్వ విద్యార్ధిని రత్నదీపిక బూర్గంపహాడ్, ఆగస్టు 22 : దృఢమైన సంకల్పంతో లక్ష్యాన్ని సాధించాలని బూర్గంప‌హాడ్ మండల పరిధిలోని సారపాక జిల్లా పరిషత్ ఉన్నత పాఠశాల పూర్వ విద్యార్ధిని కింతాడి రత్నదీపిక అన్నారు. గర్ల్ చైల్డ్ ఎంపర్‌మెంట్ కార్యక్రమంలో భాగంగా శనివారం పాఠశాలలో హెచ్ఎం దూద అధ్యక్షతన బాలికల కోసం ప్రత్యేక కార్యక్రమం నిర్వహించారు. ఈ కార్యక్రమానికి రత్నదీపిక హాజ‌రై మాట్లాడుతూ.. జీవితంలో ఒక గోల్ పెట్టుకుని దానిని సాధించాలంటే ఎలాంటి ఆటంకాలు వచ్చినా దృఢసంకల్పంతో ఎదుర్కొని అధిగమించాలని ఉద్భోధించారు. క్రమశిక్షణ, పట్టుదల ఇందుకు చాలా అవసరమన్నారు. తాను మొదటి నుండి ప్రభుత్వ పాఠశాలలో, ప్రభుత్వ పాలిటెక్నిక్‌లో చదువు పూర్తిచేసి నేడు గ్రాన్యూల్ ఇండియా లిమిటెడ్‌లో సీనియర్ టెక్నికల్ అసోసియేట్‌గా ఉద్యోగం చేస్తున్నానని తెలిపారు. చదువు ద్వారా మహిళల సాధికార‌త సాధ్యమవుతుందన్నారు. కడు పేదరికం నుండి కష్టపడి ఉన్నతస్థాయికి చేరానని విద్యార్థుల్లో స్పూర్తి, ఉత్తేజాన్ని నింపారు. అనంతరం రత్నదీపికను పాఠశాల యాజమాన్యం శాలువాతో సత్కరించి మెమోంటో అందజేశారు. ఈ కార్యక్రమంలో పాఠశాల ఉపాధ్యాయులు శ్రీదేవి, కృష్ణవేణి, హేమ, స్వరూప, శ్రీనివాసరావు, విద్యార్థులు పాల్గొన్నారు

చుంచుపల్లి, ఆగ‌స్టు 22 : చుంచుపల్లి మండలం అంబేద్కర్ నగర్ స్కూల్, ములుగుగూడెం స్కూల్ లో చదువుకునే పిల్లలకు ఎస్‌కే.అబ్దుల్ బాషిత్, గౌరీ శంకర్, దుర్గా ప్రసాద్ సహకారంతో యంగ్ ఇండియన్ బ్లడ్ డోనర్స్ క్లబ్ వ్యవస్థాపక అధ్యక్షుడు జరప్ల బాలు స్టేషనరీ అంద‌జేశారు. ఈ కార్యక్రమంలో ముఖ్య అతిథిగా పాల్గొన్న ఎంఈఓ నీరజ మాట్లాడుతూ.. ఒకవైపు అత్యవసర పరిస్థితుల్లో ఉన్న వారికి బ్లడ్ ఏర్పాటు చేస్తూ, మరో వైపు పర్యావరణ పరిరక్షణ కోసం మొక్కలు నాటడం, ప్రభుత్వ పాఠశాలలో కావాల్సిన వసతులను ఏర్పాటు చేయడం, వివిధ మెడికల్ సర్వీసెస్ అందించడం, విద్యార్థులకు కావాల్సినవి దాతల సహకారంతో అందించడం వంటి ఎన్నో కార్యక్రమాలు చేయడం అభినందనీయమన్నారు. ప్రతి ఒక్కరు సహాయం చేయడం ఓ బాధ్యతగా అలవాటు చేసుకోవాలని అన్నారు. ఈ కార్యక్రమంలో ప్రధానోపాధ్యాయులు బాలాజీ, రాములు, గ్రామ పంచాయతీ సర్పంచ్ సీతారాములు, కమిటీ చైర్మన్ రజిత, ఉపాధ్యాయులు రాము, వెంకటమ్మ పాల్గొన్నారు

Kothagudem: ఎమ్మెల్సీ బరిలో గడల శ్రీనివాసరావు? జనసేనలో ఆసక్తికర చర్చ! భద్రాద్రి కొత్తగూడెం: జనసేన తెలంగాణ రాష్ట్ర అధికార ప్రతినిధి గడల శ్రీనివాసరావు రానున్న గ్రాడ్యుయేట్ ఎమ్మెల్సీ ఎన్నికల్లో పోటీ చేసేందుకు సిద్ధంగా ఉన్నట్లు పార్టీ వర్గాల్లో చర్చ జరుగుతోంది. పార్టీ అధిష్టానం ఆదేశిస్తే ఖమ్మం-వరంగల్-నల్లగొండ జిల్లాల గ్రాడ్యుయేట్ ఎమ్మెల్సీ స్థానానికి పోటీ చేయడానికి గడల సిద్ధంగా ఉన్నట్లు సమాచారం. జనసేన పార్టీ సిద్ధాంతాలు, ప్రజా సమస్యలపై తన పోరాటాన్ని మరింత విస్తృతం చేసేందుకు ఎమ్మెల్సీ ఎన్నికలను ఒక అవకాశంగా భావిస్తున్నట్లు తెలుస్తోంది. ముఖ్యంగా పట్టభద్రులు, యువత, విద్యార్థుల సమస్యలను శాసనమండలి వేదికగా ప్రస్తావించేందుకు అవకాశం కల్పిస్తే ఎన్నికల బరిలోకి దిగేందుకు సిద్ధంగా ఉన్నట్లు పార్టీ శ్రేణుల్లో చర్చ సాగుతోంది. అయితే గడల శ్రీనివాసరావు అభ్యర్థిత్వంపై తుది నిర్ణయం జనసేన పార్టీ అధిష్టానం తీసుకోవాల్సి ఉంది. పార్టీ నాయకత్వం నిర్ణయం ప్రకటించిన అనంతరం ఆయన ఎన్నికల ప్రచారంపై స్పష్టత వచ్చే అవకాశం ఉంది

జూలూరుపాడు, ఆగస్టు 21 : రాష్ట్రంలో పాలిటెక్నిక్ డిప్లొమా విద్యార్థుల జీవితాలను అంధకారంలోకి నెట్టేలా కాంగ్రెస్ ప్రభుత్వం తీసుకొచ్చిన వివాదాస్పద జీవో నెం. 97ను తక్షణమే ఉపసంహరించుకోవాలని బీఆర్ఎస్ పార్టీ వైరా నియోజకవర్గ నాయకుడు లకావత్ గిరిబాబు ప్రభుత్వాన్ని డిమాండ్ చేశారు. జూలూరుపాడు మండల కేంద్రంలో శుక్రవారం జరిగిన విలేకరుల సమావేశంలో ఆయన మాట్లాడారు. డిప్లొమా విద్యార్థుల విద్యా ప్రమాణాలను తగ్గించి, వారి బీటెక్ ఉన్నత విద్యావకాశాలను కాలరాసే కుట్రను సహించేది లేదని ఆయన తీవ్రస్థాయిలో ధ్వజమెత్తారు. విద్యార్థుల న్యాయమైన హక్కుల సాధన కోసం బీఆర్ఎస్ పార్టీ రాజీలేని పోరాటం చేస్తుందని గిరిబాబు స్పష్టం చేశారు. ప్రభుత్వం మొండి వైఖరి విడనాడకపోతే రాష్ట్రవ్యాప్తంగా విద్యార్థులతో కలిసి పెద్ద ఎత్తున ఉద్యమిస్తామని, ప్రజాక్షేత్రంలో ప్రభుత్వ మెడలు వంచైనా న్యాయం సాధిస్తామని హెచ్చరించారు. కేసీఆర్ పాలనలో సాంకేతిక విద్యకు, పారిశ్రామిక రంగానికి పెద్దపీట వేశామని ఆయన గుర్తుచేశారు. అప్పటి ఐటీ మంత్రి కేటీఆర్ కృషితో హైదరాబాద్‌కు అంతర్జాతీయ సంస్థలు తరలివచ్చి, వేలాది మంది యువతకు ఉపాధి లభించిందని తెలిపారు. కానీ, నేటి కాంగ్రెస్ ప్రభుత్వం జాబ్ క్యాలెండర్ పేరుతో నిరుద్యోగులను నట్టేట ముంచిందని ఆగ్రహం వ్యక్తం చేశారు.ఆగస్టు 15 నాటికి రూ.2,400 కోట్ల ఫీజు రీయింబర్స్‌మెంట్ బకాయిలు విడుదల చేస్తామని చెప్పిన ప్రభుత్వం, ఆ హామీని గాలికి వదిలేసి విద్యార్థులను నిలువునా మోసం చేసిందని మండిపడ్డారు. రేవంత్ రెడ్డి ప్రభుత్వం ఇప్పటికైనా కళ్లు తెరిచి, జీవో నెం. 97ను తక్షణమే రద్దు చేయాలని, లేనిపక్షంలో విద్యార్థుల ఆగ్రహజ్వాలల్లో కాంగ్రెస్ ప్రభుత్వం భస్మం కాక తప్పదని గిరిబాబు తీవ్రంగా హెచ్చరించారు

– కొత్త‌గూడెం ఏరియా జీఎంకు రుద్రంపూర్ సర్పంచ్ విన‌తి రుద్రంపూర్, ఆగస్టు 21 : పైప్‌లైన్ పనుల కారణంగా రుద్రంపూర్ ప్రధాన రహదారి దెబ్బతిన్నందున దానిని పునరుద్ధరించడంతో పాటు గ్రామంలోని అంతర్గత రహదారుల నిర్మాణం కూడా చేపట్టాలని కోరుతూ రుద్రంపూర్ గ్రామ పంచాయతీ సర్పంచ్ బానోత్ కేస్లీ ఆధ్వర్యంలో ఉప సర్పంచ్ తోట రాజు కొత్తగూడెం ఏరియా జనరల్ మేనేజర్ సీహెచ్ వెంకటరమణను శుక్ర‌వారం మర్యాద పూర్వకంగా కలిశారు. శాలువాతో సన్మానించి, పూల మొక్కలు బహుమతిగా అందజేశారు. ఈ సందర్భంగా సర్పంచ్ పలు సమస్యలను జిఎం దృష్టికి తీసుకువెళ్లారు. ఈ సందర్భంగా రుద్రంపూర్ గ్రామ పంచాయతీ పరిధిలో సింగరేణి యాజమాన్యం చేపట్టాల్సిన అభివృద్ధి పనులు, 2020-21 నుండి రావాల్సిన బకాయిలు, బందెలదొడ్డి నిర్మాణానికి అవసరమైన స్థలం, నిర్మాణ పనులు తదితర అంశాలను జీఎం దృష్టికి తీసుకెళ్లారు. అలాగే సింగరేణి ప్రభావిత ప్రాంతమైన గ్రామ పంచాయతీ అభివృద్ధికి సింగరేణి యాజమాన్యం తమ సహాయ సహకారాలు అందిస్తుందని, సమస్యల పరిష్కారానికి అవసరమైన చర్యలు తీసుకుంటామని జీఎం సీహెచ్. వెంకటరమణ హామీ ఇచ్చారని చెప్పారు. ఈ కార్య‌క్ర‌మంలో వార్డు సభ్యుడు ఆరెల్లి శ్రీనివాస్, పంచాయతీ కార్యదర్శి నరేందర్ పాల్గొన్నారు

బూర్గంపహాడ్, ఆగస్టు 21 : నిరుపేదల పక్షాన నిలబడి ఇళ్లు, ఇళ్ల స్థలాలు, పోడు భూముల కోసం భూ పోరాటాలు చేసిన సిద్ధి వెంకటేశ్వర్లు సేవలు మరువలేనివని సీపీఐ భ‌ద్రాద్రి కొత్త‌గూడెం జిల్లా కార్యవర్గ సభ్యుడు మువ్వా వెంకటేశ్వరరావు(లడ్డా) అన్నారు. శుక్రవారం ఉమ్మడి రాష్ట్రంలో పార్టీ మాజీ సహాయ కార్యదర్శిగా పనిచే సిన సిద్ధి వెంకటేశ్వర్లు 4వ వర్ధంతిని ఘనంగా నిర్వహించారు. మువ్వా వెంకటేశ్వర్లు కపర్తిభవన్‌లో సిద్ధి చిత్రపటానికి పూలమాల వేసి నివాళులర్పించారు. ఈ సందర్భంగా మువ్వా మాట్లాడుతూ బూర్గంపహాడ్ నియోజకవర్గంగా ఉన్న సమయంలో సిద్ధి పాత్ర గొప్పదన్నారు. ఆయన మనమధ్య లేకపోయినా సిద్ధి చేసిన పోరాటాలు పేదప్రజల గుండెల్లో నిలిచిపోయాయన్నారు. ఈ కార్యక్రమంలో జిల్లా సమితి సభ్యులు పేరాల శ్రీనివాసరావు, ఎండీ సాజిద్, 7వ వార్డు సభ్యులు గూగల్ బీమానాయక్, జహీర్ పాల్గొన్నారు

సర్‌ ప్రక్రియలో భాగంగా ఎన్నికల సంఘం అధికారులు ఈనెల 17న ఓటర్ల ముసాయిదా జాబితాలను విడుదల చేశారు. భద్రాద్రి జిల్లా ఓటర్ల ముసాయిదా జాబితాలో దొర్లిన తప్పులు కొత్తగూడెం కలెక్టరేట్‌, ఆగస్టు 20 (ఆంధ్రజ్యోతి) : సర్‌ ప్రక్రియలో భాగంగా ఎన్నికల సంఘం అధికారులు ఈనెల 17న ఓటర్ల ముసాయిదా జాబితాలను విడుదల చేశారు. ఈ సందర్భంగా భద్రాద్రి కొత్తగూడెం జిల్లాలోని పాల్వంచ డివిజన్‌లో ఓ ఆసక్తికర అంశం వెలుగులోకి వచ్చింది. సోనియానగర్‌కు చెందిన మాలోత్‌ అరుణ 1992లో జన్మించగా.. ఆమె ప్రస్తుత వయసు 34 సంవత్సరాలు. కానీ ముసాయిదాలో మాత్రం 100 ఏళ్లుగా నమోదు చేశారు. ఇదే కాలనీకి చెందిన మాలోత్‌ రమేష్‌ 1991లో జన్మించగా ఆయన వయసు 35 ఏళ్లు. కానీ 99గా నమోదు చేశారు. వీరిద్దరూ పోలింగ్‌ స్టేషన్‌ నం. 45 శేఖరం బంజర యూపీఎస్సీ పాఠశాలలో ఓటు హక్కు వినియోగించుకుంటారు. ఈ విషయం గురువారం వెలుగులోకి రావడంతో ఓటర్లు ముసాయిదా జాబితాపై అనుమానాలు వ్యక్తం చేస్తున్నారు. అయితే ఆ జాబితాలో పేరు, చిరునామా, వయస్సు లాంటి వివరాలను సవరించుకోవడానికి ఫారం-8ను ఉపయోగించుకోవాలని ఎన్నికల అధికారులు సూచిస్తున్నారు

చుంచుపల్లి, ఆగస్టు 18 : చుంచుపల్లి పోలీస్ స్టేషన్ సమీపంలో జరిగిన ఘోర రోడ్డు ప్రమాదంలో 108 అత్యవసర వైద్యం సేవల సిబ్బంది సమయస్ఫూర్తితో స్పందించి ఓ వ్యక్తి ప్రాణాపాయం నుంచి బయటపడేలా చేశారు. చుంచుపల్లి నివాసి అజ్మీర మోహన్ (38) సోమవారం రాత్రి ఇంటికి వెళ్తుండగా పోలీస్ స్టేషన్ సమీపంలో ప్రమాదానికి గురయ్యాడు. ఈ ఘటనలో ఆయన తలకు తీవ్ర గాయమై అధిక రక్తస్రావం కావడంతో పరిస్థితి విషమంగా మారింది. స్థానికులు వెంటనే 108 అత్యవసర సేవలకు సమాచారం అందించగా, ఈఎంటీ స్రవంతి, పైలట్ సాంబశివరావు వేగంగా సంఘటనా స్థలానికి చేరుకుని బాధితుడికి ప్రాథమిక చికిత్స అందించారు. రక్తస్రావాన్ని అదుపు చేసి మెరుగైన చికిత్స కోసం కొత్తగూడెం ప్రభుత్వ జిల్లా ఆస్ప‌త్రికి తరలించారు. సమయానికి స్పందించి బాధితుడి ప్రాణాపాయం తప్పించిన 108 సిబ్బంది సేవలను స్థానికులు, కుటుంబ సభ్యులు ప్రశంసించారు

చుంచుపల్లి, ఆగస్టు 18 : చుంచుపల్లి మండల పరిధిలోని పెనగడప గ్రామ పంచాయతీ నడి ఒడ్డు గ్రామంలో జిల్లా ఉన్నతాధికారుల ఆదేశాల మేరకు సీజనల్ వ్యాధులు ప్రబలకుండా దోమల నివారణ చర్యలను చేపట్టారు. గ్రామ సర్పంచ్ కారం సీతారాములు, ఉప సర్పంచ్ మహమ్మద్ గోరిబాబు, ప్రాథమిక ఆరోగ్య కేంద్రం వైద్యాధికారి డాక్టర్ హరీష్ ఆధ్వర్యంలో పంచాయతీ సిబ్బంది గ్రామంలోని వీధులు, కాలువలు, దోమలు అధికంగా ఉండే ప్రాంతాల్లో దోమల మందును పిచికారి చేశారు. ఈ సందర్భంగా సర్పంచ్ ఉప సర్పంచ్ మాట్లాడుతూ.. గ్రామంలో పారిశుధ్య పనులను ముమ్మరంగా నిర్వహిస్తున్నామని తెలిపారు. ప్రజలు తమ ఇళ్ల పరిసరాలను పరిశుభ్రంగా ఉంచుకోవాలని, నిల్వ నీరు లేకుండా జాగ్రత్తలు తీసుకోవాలని సూచించారు. ఈ కార్యక్రమంలో సూపర్‌వైజ‌ర్ శ్రీనివాసరావు, హెచ్‌ఈఓ రవి, ఏఎన్‌ఎంలు, ఆశా వర్కర్లు, పంచాయతీ సిబ్బంది పాల్గొన్నారు

చుంచుపల్లి, ఆగస్టు 18 : గౌతమ్‌పూర్ గ్రామ పంచాయతీ కార్యాలయంలో ఓటర్ల ప్రత్యేక సమగ్ర సవరణ కార్యక్రమాన్ని విజయవంతంగా పూర్తి చేసిన బీఎల్‌ఓలు పద్మ, ఈశ్వరి, శివలీల, మస్తాన్‌ను ప్రజాప్రతినిధులు ఘనంగా సన్మానించారు. సర్పంచ్ సపావత్ కళ్యాణి, ఉప సర్పంచ్ గంగారం, పంచాయతీ కార్యదర్శి షర్మిల పూలమాలలు, శాలువాలతో వారిని స‌త్క‌రించారు. ఈ సందర్భంగా ప్రజా ప్రతినిధులు మాట్లాడుతూ అర్హులైన ప్రతి పౌరుడికి ఓటు హక్కు కల్పించడంలో బీఎల్‌ఓలు బాధ్యతాయుతంగా పనిచేసి సవరణ కార్యక్రమాన్ని విజయవంతం చేశారని ప్రశంసించారు. ఈ కార్యక్రమంలో వార్డు సభ్యులు, పంచాయతీ సిబ్బంది, గ్రామ పెద్దలు, ఆరోగ్య కార్యకర్తలు, గ్రామ ప్రజలు పాల్గొన్నారు

కరకగూడెం, ఆగస్టు 17 : ప్రజల సమస్యలను పరిష్కరించేందుకు ప్రభుత్వ ప్రతిష్టాత్మకంగా ఏర్పాటు చేసిన ప్రజావాణి కార్యక్రమం అధికారుల నిర్లక్ష్యం వల్ల నిర్వీర్యం అవుతోంది. అందుకు నిదర్శనమే కరకగూడెం ఎంపీడీవో కార్యాలయంలో ఎంపీడీవో శ్రీనివాస్ అధ్యక్షతన సోమవారం ఏర్పాటు చేసిన ప్రజావాణి కార్యక్రమం. ప్ర‌జావాణికి 17 శాఖలకు గానూ 9 మంది మండల స్థాయి అధికారులు మాత్రమే హజరయ్యారు. గ్రామీణ ప్రాంతాలలో ఎలాంటి సమస్యలు తలెత్తిన ప్రజావాణిలో పరిష్కరించుకోవచ్చు అన్న ఆశ రోజురోజుకు అధికారుల నిర్లక్ష్యం కారణంగా నీరు గారిపోతుంది. తమ సమస్యలను పట్టించుకునే అధికారులు లేకపోవడంతో ప్రజలు అనేక ఇబ్బందులు పడుతున్నారు. ఇదే విషయమై ఎంపీడీవో శ్రీనివాసును ' నమస్తే' వివరణ కోరగా... రెండు, మూడు మండలాలకు కలిపి కొంతమంది అధికారులు ఒక్కరే ఇన్‌చార్జిలుగా ఉండగా రాలేకపోయారని, అలాగే కొంతమంది అధికారులు శిక్షణ కార్యాక్రమంలో ఉన్నారని తెలిపారు. హాజరుకాని శాఖల అధికారుల వివరాలను జిల్లా కలెక్టర్ కు నివేదిక రూపంలో అందజేశామని తెలిపారు. ఈ ప్రజావాణిలో ఆరుగురు త‌మ స‌మ‌స్య‌ల‌పై దరఖాస్తులు స‌మ‌ర్పించారు

– సిపిఐ భ‌ద్రాద్రి కొత్త‌గూడెం జిల్లా కౌన్సిల్ సభ్యుడు మునిగడప వెంకటేశ్వర్లు రుద్రంపూర్, ఆగస్టు 17 : దేశవ్యాప్తంగా చేపట్టిన ఎస్ ఐ ఆర్ (ప్రత్యేక ఓటర్ సవరణ) కార్యక్రమం డ్రాప్ పబ్లికేషన్ ప్రచురణ చూస్తే ఎలక్షన్ కమిషన్ తీరు కొండను త‌వ్వి ఎలుకను పట్టినట్టుగా ఉందని సిపిఐ భ‌ద్రాద్రి కొత్త‌గూడెం జిల్లా కౌన్సిల్ సభ్యుడు, మాజీ మున్సిపల్ ఫ్లోర్ లీడర్ మునిగడప వెంకటేశ్వర్లు అన్నారు. నేడు ప్రకటించిన ఎస్ ఐ ఆర్ డ్రాప్ పబ్లికేషన్ చూస్తే అలాగే అనిపిస్తుందన్నారు. నెల రోజులు అధికారులు,బి ఎల్ ఓ, బిఎల్ఏలు ప్రతి ఇల్లు తిరిగి ఓటర్ వివరాలు, ఫోటోలు మార్చుకునే వారి ఫొటోలు సేకరించి, ఓటర్ లిస్ట్ లో ఉన్న తప్పులు, అడ్రస్ మార్పులు తదితర వివరాలు అప్‌లోడ్ చేసిన కూడా నేడు ప్రకటించిన లిస్టులో అవి లేకపోవడం ఆ వివరాలు లేకపోవడం ఏంటని ప్రశ్నించారు. యధాతధంగా కొత్త సీసాలో పాత సారా పోసినట్లుగా షిఫ్టేడ్‌, డబుల్ ఓట్లు తొలగించి లిస్టును ప్రకటించారే తప్ప ఓటరు ఇచ్చిన వివరాలు, మార్పులు కానీ, కొత్త ఫొటో మార్పు కానీ ఎలక్షన్ కమిషన్ ప్రకటించిన డ్రాప్లికేషన్‌లో అవి కనపడడం లేదన్నారు. మరలా ఫారం 8 తో ఓటర్ దరఖాస్తు చేసుకోవాలంటే కలర్ ఫొ టో దిగాలి, జిరాక్స్‌లు తీయాలి, ఇలా ఆర్థిక భారం, కాలయాపన జరుగుతుందని ఇది గమనించకపోవడం దారుణమన్నారు. ఇప్పటికైనా ఫైనల్ పబ్లికేషన్‌లో ఎస్ ఐ ఆర్ సర్వేలో ఓటర్ ఇచ్చిన సమాచారాన్ని వారు కొత్త ఫొటోలను అడ్రస్ మార్పు అప్‌లోడ్ చేసిన వివరాల ప్రకారం ఫైనల్ పబ్లికేషన్‌లో ప్రచురించాలని ఎలక్షన్ అధికారులను కోరుతున్నట్లు పేర్కొన్నారు

– గంటసేపు ఆలస్యంగా ప్రారంభం – కేవలం నాలుగే అప్లికేషన్లు దాఖలు – ప్రచారం లేక స్పందన కరువు భద్రాచలం, ఆగస్టు 17 : భద్రాచలం మండల ప్రజా పరిషత్ కార్యాలయంలో సోమవారం నిర్వహించిన ప్రజావాణి కార్యక్రమం ప్రజాదరణ లేక బోసిపోయింది. అధికారుల నిర్లక్ష్యం, సరైన ప్రచారం లేకపోవడంతో ప్రజలు రాక ఈ కార్యక్రమం వెలవెలబోయింది. సమస్యల పరిష్కారం కోసం ఉదయం 10:00 గంటలకే ప్రారంభం కావాల్సిన ప్రజావాణి అధికారుల ఆలస్యం కారణంగా 11:00 గంటలకు ప్రారంభమైంది. మరోవైపు ప్రజావాణి నిర్వహణపై భద్రాచలంలో ఎలాంటి ముందస్తు ప్రచారం కల్పించక పోవడంతో ప్రజలకు సమాచారం లేకుండా పోయింది. ప్రజలు తమ సమస్యలు విన్నవించుకునేందుకు రాకపోవడంతో రోజంతా కలిపి కేవలం నాలుగు వినతి పత్రాలు (అప్లికేషన్లు) మాత్రమే అధికారులకు అందాయి. అధికారుల సమయపాలన రాహిత్యం, ప్రజావాణిపై సమాచార లోపం పట్ల స్థానిక ప్రజలు తీవ్ర అసంతృప్తి వ్యక్తం చేస్తున్నారు. ఇప్పటికైనా ఉన్నతాధికారులు స్పందించి ప్రజావాణి కార్యక్రమాన్ని నిర్దిష్ట సమయానికి ప్రారంభించేలా, విస్తృత ప్రచారం కల్పించేలా చర్యలు తీసుకోవాలని కోరుతున్నారు

కల్యాణ లక్ష్మి, షాదీ ముబార‌క్ పథ‌కాల‌ను ర‌ద్దు చేస్తే ఊరుకోమ‌ని హెచ్చ‌రిక భద్రాద్రి కొత్తగూడెం, ఆగ‌స్టు 17 : కల్యాణలక్ష్మి, షాదీ ముబారక్ పథ‌కాలను రద్దు చేస్తే ఊరుకోమ‌ని హెచ్చ‌రిస్తూ బీఆర్ఎస్ శ్రేణులు భ‌ద్రాద్రి కొత్త‌గూడెం జిల్లా వ్యాప్తంగా సోమ‌వారం ధర్నాలు, నిర‌స‌న‌లు చేప‌ట్టారు. అన్ని తాసీల్దార్ కార్యాలయాల ఎదుట పార్టీ నాయకులు, కార్యకర్తలు ఆందోళనకు దిగారు. పేదల పెండ్లీళ్ల‌కు అప్ప‌టి కేసీఆర్ ప్రభుత్వం తీసుకువ‌చ్చిన ప్ర‌తిష్ఠాత్మ‌కం ప‌థ‌కాన్ని కాంగ్రెస్ ప్ర‌భుత్వం రద్దు చేయాల‌ని చూడ‌డం దుర్మార్గపు చర్య అని నాయకులు దుయ్య‌బ‌ట్టారు. వెంటనే పేద కుటుంబాలను ఆదుకునే కల్యాణ‌లక్ష్మి పథకాన్ని కొన‌సాగించేలా చ‌ర్య‌లు చేప‌ట్టాల‌ని ప్రభుత్వాన్ని డిమాండ్ చేశారు. [caption id="attachment_2486045" align="alignnone" width="1200"] భ‌ద్రాద్రి కొత్త‌గూడెం జిల్లా వ్యాప్తంగా బీఆర్ఎస్ నిర‌స‌న‌లు[/caption] కొత్తగూడెం నియోజకవర్గంలో ఎంపీ వద్దిరాజు ర‌విచంద్ర‌, మాజీ మంత్రి వనమా వెంకటేశ్వరరావు పిలుపుతో కొత్తగూడెం, చుంచుపల్లి, సుజాతనగర్, లక్ష్మీదేవీపల్లి, పాల్వంచ‌, జూలూరుపాడు మండలాల్లో భారీ ఎత్తున నాయకులు పాల్గొని నిరసనలు తెలిపారు. ఈ కార్యక్రమంలో మున్సిపల్ మాజీ చైర్మన్ కాపు సీతామహాలక్ష్మి. బీఆర్ఎస్‌వీ జిల్లా అధ్యక్షుడు అనుదీప్. మున్సిపల్ మాజీ వైస్ చైర్మన్ దామోదర్. లక్ష్మీదేవిపల్లి మండల అధ్యక్షుడు కోటి వెంకటేశ్వర్లు. సుజాతనగర్ మండల అధ్యక్షుడు లావుడియా సత్యనారాయణ, పాల్వంచ మండలం అధ్యక్షుడు మంతపురి రాజు గౌడ్. జగన్, కార్పొరేటర్లు సింధు తపస్వి, గుణ చరిత, మధు, చంద్, రాంబాబు, సాగర్, గ్రామ పంచాయతీ సర్పంచులు, ఉప సర్పంచులు, పార్టీ నాయకులు పాల్గొన్నారు

దమ్మపేట, ఆగస్టు 17 : కాంగ్రెస్ ప్రభుత్వం కావాలనే కల్యాణ లక్ష్మీ, షాదీ ముబారక్ పథకాన్ని నిలిపివేయ జూస్తుంద‌ని అశ్వారావుపేట మాజీ ఎమ్మెల్యే మెచ్చా నాగేశ్వ‌ర‌రావు అన్నారు. బీఆర్ఎస్ వర్కింగ్ ప్రెసిడెంట్ కేటీఆర్ ఆదేశాల మేరకు సోమ‌వారం పార్టీ శ్రేణులతో క‌లిసి నిర‌స‌న వ్య‌క్తం చేసి డిమాండ్ల‌తో కూడిన ప‌త్రాన్ని దమ్మపేట డిప్యూటీ తాసీల్దార్ రామకృష్ణకి అందజేశారు. ఈ సందర్భంగా మెచ్చా మాట్లాడుతూ.. దోచుకోవడం దాచుకోవ‌డ‌మే పనిగా ముఖ్యమంత్రి నుండి ఎమ్మెల్యే వ‌ర‌కు పెట్టుకున్నారన్నారు. ప్రజల సంక్షేమాన్ని పూర్తిగా గాలికి వదిలేసిన‌ట్లు తెలిపారు. కోట్లాది సాధించుకున్న రాష్ట్రంలో ఏ నిరుపేద ఆడబిడ్డ ఇబ్బంది పడకూడదనే ఆలోచనతో ఒక మేనమామలా కేసీఆర్ కల్యాణలక్ష్మీ, షాదీ ముబారక్ పథకాన్ని ప్రవేశపెట్టి ఎంతోమందికి ఆర్థికంగా సహాయపడ్డారన్నారు. కాంగ్రెస్ నాయకులు తులం బంగారం ఇస్తామ‌ని చెప్పి ఇప్పుడు ఈ పథకాన్ని నిలిపివేయడానికి కుట్రలు చేస్తున్నారన్నారు. ఈ కార్యక్రమంలో మండల మాజీ అధ్యక్షుడు దొడ్డ రమేష్, మాజీ వైస్ ఎంపీపీ దారా మల్లిఖార్జునరావు, మండల మాజీ ఉపాధ్యక్షుడు గాజుబోయిన యేసు బాబు, నాయకపోడు సంఘం రాష్ట్ర నాయకుడు రావుల శ్రీనివాసరావు, మండల నాయకుడు తుమ్మల లక్ష్మణ‌రావు, నియోజకవర్గ యూత్ మాజీ కార్యదర్శి యార్లగడ్డ శ్రీనివాసరావు, మాజీ ఎంపీటీసీలు దేవరలపల్లి అజయ్ కుమార్, జలగం వాసు, చీకటి రామయ్య, గుత్తి శ్రీను, అబ్దుల్ జిన్నా, సర్పంచులు యాట్ల రాందాస్, కొమరం సుశీల, ఉప సర్పంచ్ రామకృష్ణ, వార్డు మెంబర్లు దారా రాము, రూప రాంబాబు, ఉయ్యాల లక్ష్మీనారాయణ, తోలేం మల్లేశ్వరావు, సున్నం కృష్ణ, వేలుగోటి మహేష్, కాసిని శ్రీను, మద్దెల పుల్లారావు, అడపా వెంకట నరసయ్య నాయుడు, పాశం ప్రసాద్, వల్లేపు నాగేశ్వరరావు, గుడిపూడి రవి, గొర్రెపాటి వెంకటేశ్వరరావు, కౌలురి నాగయ్య, గుమ్మడపు విష్ణు, కోర్స వెంకటేష్, వాసం పండు, కౌలురి ఏసు, కందుకూరి రాంబాబు, గణేష్, అశోక్, పాశ్యం శరణ్‌, మచ్చల ముత్యాలు, నాటి సుధాకర్ పాల్గొన్నారు

రుద్రంపూర్, ఆగస్టు 17 : నేతాజీ రామవరం ప్రభుత్వ ప్రాథమిక పాఠశాలలో నిర్వహిస్తున్న “నా మొక్క.. నా బాధ్యత” కార్యక్రమంలో షీ టీం ఎస్ఐ రమాదేవి ముఖ్య అతిథిగా పాల్గొన్నారు. ఈ సందర్భంగా విద్యార్థులకు మొక్కల సంరక్షణతో పాటు వ్యక్తిగత భద్రత, అత్యవసర సమయాల్లో తీసుకోవాల్సిన జాగ్రత్తలపై అవగాహన కల్పించారు. ఈ సందర్భంగా ఎస్ఐ మాట్లాడుతూ.. “మొక్కను నాటడం అంటే కేవలం ఒక మొక్కను భూమిలో నాటడం కాద‌ని మన భవిష్యత్‌ను నాటడం” అన్నారు. ప్రతి విద్యార్థి ఒక మొక్కను నాటి, దానిని స్నేహితుడిలా భావించి సంరక్షించాలని సూచించారు. పిల్లల భద్రతపై అవగాహన కల్పిస్తూ సేఫ్ టచ్, అన్‌సేఫ్ టచ్ గురించి వివరించారు. ఎవరైనా వేధించినా, అసభ్యకరంగా ప్రవర్తించినా, వెంటపడినా లేదా బెదిరించినా భయపడకుండా వెంటనే తల్లిదండ్రులు, ఉపాధ్యాయులు లేదా పోలీసులకు సమాచారం అందించాలని చెప్పారు. సమస్యలను మనసులో పెట్టుకుని మౌనంగా ఉండకూడదన్నారు. అత్యవసర పరిస్థితుల్లో డయల్ 112 సేవలను వినియోగించుకోవాలని సూచించారు

– వన్యప్రాణుల వేటకు అమర్చిన బైండింగ్ వైరు స్వాధీనం – వివ‌రాలు వెల్ల‌డించిన‌ పాల్వంచ సీఐ సతీష్ బూర్గంపహాడ్, ఆగస్టు 15 : వన్య ప్రాణుల వేట కోసం అమర్చిన విద్యుత్ వైర్లు తగిలి చెరువుసింగారం వెస్ట్ బీట్ ఆఫీసర్ బానోత్ నవీన్ మృతిచెందిన విషయం తెలిసిందే. నవీన్ మృతికి కారణమైన నలుగురు నిందితులను అరెస్టు చేసినట్లు పాల్వంచ సీఐ సతీష్ శనివారం తెలిపారు. ఈ నెల 11న రాత్రి నకిరిపేట అటవీ ప్రాంతంలో కొందరు వ్యక్తులు అక్రమంగా అడవి జంతువులను వేటాడేందుకు వైర్లను అమర్చారని సమాచారం అందగా ఫారెస్ట్ బీట్ ఆఫీసర్ బానోత్ నవీన్, డీఆర్వో, తోటి సిబ్బందితో కలిసి ఆ ప్రదేశానికి వెళ్లి స‌ద‌రు వ్యక్తుల ఆచూకీ కోసం వెతుకుతుండగా విద్యుత్ వైర్లు తగిలి నవీన్ మృతిచెందగా డీఆర్వో అనార్కలీ ఫిర్యాదు చేసిన‌ట్లు చెప్పారు. ఫిర్యాదు మేరకు నవీన్ మృతికి కారకులైన లక్ష్మీపురానికి చెందిన ఆవుల నాగిరెడ్డి, దాసరి నరేష్, తాటి వీరబాబు, నాగినేనిప్రోలు రెడ్డిపాలెంకు చెందిన కన్నెదారి అనంతయ్యపై కేసులు నమోదు చేసిన‌ట్లు వెల్ల‌డించారు. నమ్మదగిన సమాచారంతో శనివారం ఆవుల నాగిరెడ్డితో పాటు అతని ఇంట్లోనే ఉన్న మిగిలిన ముగ్గురిని అరెస్టు చేసి రిమాండ్‌కు తరలించిన‌ట్లు సీఐ తెలిపారు. నిందితులు వన్య ప్రాణులను హతమార్చేందుకు ఉపయోగించిన బైండింగ్ వైరు, అక్కడ పాతడానికి ఉపయోగించిన కర్రలు, గడ్డపలుగు, ఖాళీ మందు బాటిళ్లను స్వాధీనం చేసుకున్నట్లు తెలిపారు. ఎవరైనా అటవీ జంతువులను వేటడానికి అక్రమంగా విద్యుత్ తీగలు అమర్చి అమాయక జంతువుల ప్రాణాలు, మ‌నుషుల‌ ప్రాణాలు పోవడానికి కారణమైతే చట్టపరంగా కేసులు నమోదు చేసి కఠిన చర్యలు తీసుకుంటామని హెచ్చరించారు. ఈ సమావేశంలో ఎస్ఐలు మేడా ప్రసాద్, నాగభిక్షం పాల్గొన్నారు

కరకగూడెం, ఆగస్టు 15 : వేగంగా వస్తున్న కారు అదుపుతప్పి ఆర్టీసీ బస్సును ఢీకొట్టిన సంఘటన కరకగూడెం మండల పరిధిలోని రాళ్లవాగు వద్ద శనివారం చోటుచేసుకుంది. ఇందుకు సంభందించి ఎస్ఐ పీవీ నాగేశ్వరరావు తెలిపిన వివరాల ప్రకారం... కరకగూడెం నుండి మణుగూరు వైపు ప్రయాణీకులతో వెళ్తున్న ఆర్టీసీ బస్సును మణుగూరు నుండి కరకగూడెం వైపు వేగంగా వస్తున్న కారు అదుపుతప్పి రాళ్లవాగు వద్ద ఢీ కొట్టింది. దీంతో బస్సులో ప్రయాణీకులకు స్వల్ప గాయాలు కాగా కారులో ప్రయాణీస్తున్న చక్రపాణి అనే వ్యక్తికి కారులోని ఎయిర్ బెలూన్స్ ఓపెన్ కావడంతో పెను ప్రమాదం తప్పింది. సదరు వ్యక్తికి ఓ చేయ్యి విరిగి తీవ్ర రక్తస్రావం అయ్యింది. విషయం తెలుసుకున్న పోలీస్ సిబ్బంది ఘటన స్థలాన్ని ప‌రిశీలించారు. ఆర్టీసీ డ్రైవర్ ఫిర్యాదు మేరకు కారు నడుపుతున్న వ్యక్తిపై కేసు నమోదు చేసి దర్యాప్తు చేస్తున్నట్లు ఎస్ఐ తెలిపారు

బూర్గంపహాడ్, ఆగస్టు 15 : సంత సమీపంలో ఎదురెదురుగా ద్విచక్రవాహనాలు ఢీకొనడంతో ఇద్దరికి తీవ్రగాయాలైన సంఘటన శనివారం సాయంత్రం చోటుచేసుకుంది. స్థానికులు తెలిపిన వివరాల ప్రకారం...బూర్గంప‌హాడ్ మండల పరిధిలోని మోరంపల్లిబంజర్ విద్యుత్ సబ్ స్టేషన్‌లో లైన్‌మెన్‌గా పని చేస్తున్న జగన్‌మోహ‌న్‌రెడ్డి బైక్‌పై వెళ్తుండ‌గా సంత ప్రాంగణానికి చేరుకునే లోగా మరో బైక్ వచ్చి ఢీకొట్టింది. ఈ ఘటనలో జగన్‌మోహ‌న్‌రెడ్డి తలకు బలమైన గాయమైంది. బుడ్డగూడెం గ్రామానికి చెందిన పాయం దినేశ్‌ అనే మరో వ్యక్తి తీవ్రంగా గాయపడ్డాడు. వీరిని ప్రాథమిక ఆరోగ్య కేంద్రానికి తరలించి ప్రథమ చికిత్స చేసి అనంతరం మెరుగైన వైద్యం కోసం 108 వాహనంలో భద్రాచలం ఆస్ప‌త్రికి తరలించారు

బూర్గంపహాడ్, ఆగస్టు 15 : 80వ స్వాతంత్య్ర దినోత్సవం పురస్కరించుకుని అంజనాపురం గ్రామానికి చెందిన ఎన్ఆర్ఎ తేజావత్ జానకిరామ్ సూర్యం మెమోరియల్ ఫౌండేషన్ ట్రస్టు ఆధ్వర్యంలో బూర్గంప‌హాడ్‌ మండలంలోని అంజనాపురం ఎంపీపీఎస్, మోరంపల్లిబంజర్ జడ్పీహెచ్ఎస్, ప్రైమరీ, బుడ్డగూడెం, జింకలగూడెం, నకిరిపేట, పోలవరం ప్రాథమిక ప్రభుత్వ పాఠశాలల విద్యార్థులకు 1,000 నోటు పుస్తకాలను శనివారం పంపిణీ చేశారు. ఈ సందర్భంగా ట్రస్టు వ్యవస్థాపకుడు జానకిరామ్ మాట్లాడుతూ ట్రస్ట్‌ ద్వారా విద్యార్ధుల విద్యాభివృద్ధికి అవసరమైన సహాయం అందించడం ప్రధాన లక్ష్యమన్నారు. ప్రతి విద్యార్ధికి నాణ్యమైన విద్యకు ప్రోత్సాహం, యువతలో ప్రతిభ, నాయకత్వం, అవకాశాలను పెంపొందించడం, మహిళలకు ఆత్మ విశ్వాసం, స్వావలంబన, అవకాశాలు కల్పించడం, రైతుల సంక్షేమం, అభివృద్ధికి అండగా నిలవడం అనే లక్ష్యాలతో ట్రస్టు ముందుకు సాగుతుందని, ఈ అంశాలపై ఫౌండేషన్ సహకారం ఎల్లప్పుడూ ఉంటుందన్నారు. ఈ కార్యక్రమంలో ఫౌండేషన్ సభ్యులు బాణావత్ మురళీకృష్ణ, తేజావత్ సీతారాములు, బానోత్ హుస్సేన్ నాయక్, భూక్యా దివ్యశ్రీ, భూక్యా సీతారాంనాయక్, శ్యామ్ రాథోడ్, భూక్యా మురళి, చంటి, వినోద్, గాంధీ, పాఠశాలల ఉపాధ్యాయులు, విద్యార్థులు పాల్గొన్నారు

బూర్గంపహాడ్, ఆగస్టు 15 : ప్రతి సోమవారం బూర్గంపహాడ్ మండల ప్రజా పరిషత్ కార్యాలయంలో ఉదయం 10 గంటల నుండి మధ్యాహ్నం 1 గంట వరకు ప్రజావాణి నిర్వహించడం జరుగుతుందని ఎంపీడీఓ కుడుముల జమలారెడ్డి శనివారం తెలిపారు. ప్రజావాణి కార్యక్రమంలో భాగంగా మండలంలోని గ్రామాలకు చెందిన ప్రజలు తమ సమస్యలు, ఫిర్యాదులు నేరుగా కార్యాలయంలో సమర్పించవచ్చని చెప్పారు. వినతులను తక్షణమే పరిష్కరించేలా సంబంధిత శాఖల అధికారులు అందుబాటులో ఉండి చర్యలు చేపడతారని వెల్ల‌డించారు. సమస్యలకు సంబంధించిన వినతులను ప్రజలు నిర్దేశిత సమయంలో సమర్పించాలన్నారు. మండలంలోని ప్రజలందరూ ప్రజావాణిని సద్వినియోగం చేసుకోవాలని ఆయ‌న కోరారు

రాజీవ్ లింక్ కెనాల్‌కు గోదావరి జలాలను మంత్రి తుమ్మల నాగేశ్వరరావు విడుదల చేశారు. ఎల్‌నినో ప్రభావంతో వర్షాలు సరిగ్గా లేక పంటల సాగుకు ఇబ్బందులు ఏర్పడ్డాయన్నారు. రాజీవ్ లింక్ కెనాల్ ద్వారా గోదావరి జలాలు.. సాగర్ ఆయకట్టుకు భరోసాగా మారిందని మంత్రి తెలిపారు. భద్రాద్రి కొత్తగూడెం, ఆగస్టు 15: రాజీవ్ లింక్ కెనాల్‌కు గోదావరి జలాలను మంత్రి తుమ్మల నాగేశ్వరరావు విడుదల చేశారు. ఈరోజు(శనివారం) అశ్వాపురం మండలం సీతారామ పంప్ హౌస్ వద్ద మంత్రి తుమ్మల, ఎమ్మెల్యే పాయం వెంకటేశ్వర్లు.. మోటార్ స్విచ్ ఆన్ చేశారు. ఈ సందర్భంగా మంత్రి మాట్లాడుతూ.. ఎల్‌నినో ప్రభావంతో వర్షాలు సరిగ్గా లేక పంటల సాగుకు ఇబ్బందులు ఏర్పడ్డాయని తెలిపారు. రాజీవ్ లింక్ కెనాల్ ద్వారా గోదావరి జలాలు.. సాగర్ ఆయకట్టుకు భరోసాగా మారిందన్నారు. మారేళ్లపాడు ఎత్తిపోతల పథకాన్ని నెలాఖరులోపు పూర్తి చేయాలని అధికారులను ఆదేశించారు. నీళ్ల దగ్గర రాజకీయాలు చేస్తే ఊరుకునేది లేదని స్పష్టం చేశారు. రైతులు ఎవరూ కూడా దిగులు పడొద్దని.. మీ భూముల్లో పైప్‌లైన్ వేసిన మరలా పూడ్చి ఇస్తామని మంత్రి చెప్పారు. యధావిధిగా మళ్లీ వ్యవసాయం చేసుకోవచ్చని అన్నారు. పినపాకకి నీళ్లు ఇవ్వకుండా ఖమ్మంకి తీసుకెళ్లటం బాధగా ఉందన్నారు. ఎన్ని అడ్డంకులు వచ్చినా.. ఎవరు ఎటువంటి రాజకీయాలు చేసినా నెలాఖరుకు మారేళ్లపాడు ఎత్తిపోతల పథకాన్ని పూర్తి చేస్తామని మంత్రి తుమ్మల నాగేశ్వరరావు స్పష్టం చేశారు. గోల్కొండ కోటపై జాతీయ జెండా ఆవిష్కరించిన సీఎం రేవంత్ తెలంగాణలో సంక్షేమమే మా ప్రభుత్వ లక్ష్యం: సీఎం రేవంత్ రెడ్డి

జూలూరుపాడు, ఆగస్టు 14 : ప్రజల సమస్యలను స్థానిక స్థాయిలోనే త్వరితగతిన పరిష్కరించేందుకు ప్రతి సోమవారం మండల స్థాయి ప్రజావాణి కార్యక్రమాన్ని నిర్వహించనున్నట్లు జూలూరుపాడు ఎంపీడీవో తాళ్లూరి రవి శుక్రవారం ఒక ప్రకటనలో తెలిపారు. ప్రభుత్వ మార్గదర్శకాల ప్రకారం స్థానిక మండల పరిషత్ కార్యాలయ సమావేశ మందిరంలో ఉదయం 10:00 గంటల నుండి మధ్యాహ్నం 1:00 గంటల వరకు ఈ కార్యక్రమం జరుగుతుందని వెల్ల‌డించారు. ప్రజలు తమ సమస్యలు, విజ్ఞప్తులపై నేరుగా దరఖాస్తులు సమర్పించవచ్చని తెలిపారు. మండల స్థాయి అధికారులు అందరూ నిర్ణీత సమయానికి తప్పనిసరిగా హాజరై, ప్రజల నుంచి వచ్చిన అర్జీలను స్వీకరించి సత్వర పరిష్కారానికి చర్యలు తీసుకోవాలని ఆదేశించారు. పారదర్శకమైన, బాధ్యతాయుతమైన పాలన అందించడమే ఈ కార్యక్రమ ముఖ్య ఉద్దేశమని, ప్రజలు ఈ అవకాశాన్ని సద్వినియోగం చేసుకోవాలని ఎంపీడీవో కోరారు

– ఫీజు రీయింబ‌ర్స్‌మెంట్‌, పెండింగ్ స్కాలర్‌షిప్స్ తక్షణమే విడుదల చేయాల‌ని డిమాండ్‌ కొత్తగూడెం గణేష్ టెంపుల్, ఆగస్టు 13 : పెండింగ్‌లో ఉన్న స్కాలర్‌షిప్స్, ఫీజు రీయింబ‌ర్స్‌మెంట్ త‌క్ష‌ణ‌మే విడుదల చేయాలని డిమాండ్ చేస్తూ గురువారం ఎస్ఎఫ్ఐ ఆధ్వర్యంలో భ‌ద్రాద్రి కొత్త‌గూడెం కలెక్టరేట్ ఎదుట ధర్నా నిర్వహించారు. ఈ సందర్భంగా ఎస్ఎఫ్ఐ జిల్లా అధ్యక్షుడు మంద నాగకృష్ణ మాట్లాడుతూ.. తెలంగాణ రాష్ట్ర వ్యాప్తంగా ఉన్న రూ.10,814 కోట్ల స్కాలర్‌షిప్స్, ఫీజు రీయింబర్స్‌మెంట్స్‌ను తక్షణమే విడుదల చేయాలని, ఫీజులు చెల్లించలేదనే పేరుతో విద్యార్థుల సర్టిఫికెట్లను కళాశాలల్లోనే నిలిపివేసి తీవ్రంగా వేధిస్తున్న ప్రైవేట్ విద్యాసంస్థలపై ప్రభుత్వం కఠిన చర్యలు తీసుకోవాలన్నారు. రాష్ట్రంలో కాంగ్రెస్ అధికారంలోకి వచ్చిన తర్వాత పెండింగ్‌లో ఉన్న స్కాలర్‌షిప్స్, ఫీజు రీయింబర్స్‌మెంట్స్‌ను విడుదల చేస్తామని హామీ ఇచ్చినప్పటికీ, ఇప్పటికీ విద్యార్థులకు పూర్తిస్థాయిలో నిధులు అందలేదని విమర్శించారు. ప్రభుత్వం నిధులు విడుదల చేయకపోవడంతో ఆ భారాన్ని విద్యార్థులు, వారి తల్లిదండ్రులపై మోపడం అన్యాయమన్నారు. ఫీజు రీయింబర్స్‌మెంట్ ప్రభుత్వం చెల్లించాల్సిన నిధులు కాగా, వాటిని విద్యార్థుల నుంచి బలవంతంగా వసూలు చేయడం సరికాదన్నారు. ఫీజులు చెల్లించలేదనే కారణంతో విద్యార్థుల ఒరిజినల్ సర్టిఫికెట్లు,మెమోలు, ఇతర విద్యా పత్రాలను కళాశాలలు తమ వద్ద ఉంచుకుని విద్యార్థులను, తల్లిదండ్రులను వేధిస్తున్న ఘటనలు రాష్ట్రవ్యాప్తంగా జరుగుతున్నాయని తెలిపారు. ప్రభుత్వం తక్షణమే జోక్యం చేసుకుని విద్యార్థుల సర్టిఫికెట్లను ఎలాంటి షరతులు లేకుండా అందించేలా చర్యలు తీసుకోవాలని డిమాండ్ చేశారు. విద్యార్థుల సర్టిఫికెట్లను నిలిపివేసే విద్యాసంస్థలపై కఠినమైన చర్యలు తీసుకోవడంతో పాటు, విద్యార్థుల నుంచి అక్రమంగా వసూలు చేసిన మొత్తాలను తిరిగి చెల్లించేలా చర్యలు తీసుకోవాలని కోరారు. ప్రభుత్వం స్కాలర్‌షిప్స్, ఫీజు రీయింబర్స్‌మెంట్స్‌ను సకాలంలో విడుదల చేయకపోవడం వల్ల వేలాది మంది విద్యార్థులు తమ చదువులను కొనసాగించలేని పరిస్థితి ఏర్పడుతోందన్నారు. ప్రభుత్వం విద్యార్థుల చదువును బాధ్యతగా చూడాలి తప్ప, ప్రైవేట్ కళాశాలల ఆర్థిక ప్రయోజనాలకు విద్యార్థులను బలిచేయకూడదని అన్నారు. ఈ కార్యక్రమంలో ఎస్ఎఫ్ఐ జిల్లా ఉపాధ్యక్షులు

రుద్రంపూర్, ఆగస్టు 12 : సింగరేణి కొత్తగూడెం ఏరియాలో ఎన్ సి డబ్ల్యూ ఏ (జాతీయ బొగ్గు వేతన ఒప్పందం (National Coal Wage Agreement) ఉద్యోగుల క్వార్టర్స్ కేటాయింపునకు బుధవారం రుద్రంపూర్‌లోని ఆర్ సి ఓ ఏ క్లబ్‌లో కౌన్సెలింగ్ నిర్వహించారు. సీనియారిటీ ప్రాతిపదికన చేపట్టిన ఈ కౌన్సెలింగ్ ప్రక్రియ యాజమాన్యం, కమిటీ సభ్యులు, యూనియన్ ప్రతినిధులు, సంబంధిత అధికారుల సమక్షంలో పారదర్శకంగా కొనసాగింది. ఈ సందర్భంగా ఎన్ సి, ఎం సి, ఎం.హెచ్, సీ2, టి 2, ఎం.డి, ఎన్.బి, ఏ టైపు క్వార్టర్స్ కేటాయింపునకు సంబంధించిన విధానాలు, అర్హతలు, ప్రాధాన్యత క్రమం తదితర అంశాలను అధికారులు ఉద్యోగులకు వివరించారు. మొత్తం 59 మంది ఉద్యోగులు కౌన్సెలింగ్‌కు నమోదు చేసుకోగా, వారిలో 14 మంది క్వార్టర్స్‌ను ఎంపిక చేసుకున్నారు. 36 మంది గైర్హాజరయ్యారు. మరో 9 మంది క్వార్టర్స్ ఎంపికపై ఆసక్తి చూపలేదు. ఈ కార్యక్రమంలో ఎస్ఓటు జీఎం ఎం. గోవిందరావు, పర్సనల్ మేనేజర్ ఎల్. తిరుపతి, ఏజీఎం (సివిల్) రామకృష్ణ, డివైపీఎం జి. హరీష్ ఏఐటీయూసీ బ్రాంచ్ కార్యదర్శి గట్టయ్య, ఐ ఎన్ టి యు సి వైస్ ప్రెసిడెంట్ ఎం.డి. రజాక్‌తో పాటు ఇతర అధికారులు, ఉద్యోగులు పాల్గొన్నారు

– మున్సిపల్ సిబ్బంది భూక్య జైత్రంకు తీవ్ర గాయాలు కొత్తగూడెం టౌన్, ఆగస్టు 11 : సుజాతనగర్ మండల పరిధిలోని 23వ డివిజన్‌లో గల మంగపేటలో బుధవారం వీధిలైట్లు మారుస్తుండగా కరెంట్ షాక్ తగిలి మున్సిపల్ సిబ్బంది భూక్య జైత్రం తీవ్ర గాయాలపాలయ్యాడు. తలకి తీవ్ర గాయమై రక్తస్రావం జరుగుతున్న జైత్రంను హుటాహుటిన స్థానిక కొత్తగూడెం ప్రభుత్వ ఆస్ప‌త్రికి తరలించగా, పరిస్థితి విష‌మంగా ఉండడంతో, మెరుగైన వైద్యం కోసం వైద్యులు ఖమ్మం తరలించాలని సూచించారు. జైత్రం గతంలో మంగపేట ఉప సర్పంచ్‌గా పని చేశాడు. ప్రస్తుతం కొత్తగూడెం మున్సిపల్ పరిధిలో మల్టీ ప‌ర్ప‌స్‌ వర్కర్ గా డివిజన్‌లో పనులను నిర్వర్తిస్తున్నట్లు గ్రామస్తులు తెలిపారు

చండ్రుగొండ, ఆగస్టు 12 : భద్రాద్రి కొత్తగూడెం జిల్లా చండ్రుగొండ మండల కేంద్రంలో గల సబ్ రిజిస్టర్ కార్యాలయంలో మద్యం మత్తులో ఓ బంజారా నాయకుడు వీరంగం సృష్టించిన‌ సంఘటన ఆలస్యంగా వెలుగులోకి వచ్చింది. ఈ నెల 11న మంగళవారం సాయంత్రం నాలుగు గంటలకు మద్యం సేవించిన అధికార పార్టీకి చెందిన బంజారా నాయకుడు కార్యాలయంలోకి ప్రవేశించి చండ్రుగొండ సబ్ రిజిస్టర్ జగదీశ్వర్ ప్రసాద్ పై చిందులు వేశాడు. ఇటీవ‌ల సమాచార హక్కు ప్రకారం చండ్రుగొండ మండలంలో గల ప్రభుత్వ రెవెన్యూ భూముల వివరాలను తీసుకుని అందులో గిరిజనేతరులు ముఖ్యంగా పేదలు నిర్మించిన ఇండ్లను తొలగించి రెండు కుంటల‌ భూమి తనకు ఇవ్వాలని పరోక్షంగా బెదిరిస్తూ గత కొంతకాలంగా వస్తున్నాడు. ఈ క్రమంలో మద్యం మత్తులో నేరుగా తాసీల్దార్ తో తనకు భూములను కొలిచి చూపించాలని, ఏ ప్రభుత్వ భూమి ఎక్కడ ఉందో ఎంత ఉందో చూపించాలని డిమాండ్ చేశాడు. లేకుంటే తనకు రెండు కుంటలు భూమి ఇవ్వాలని లేకపోతే నీ అంత చూస్తానని బెదిరించారు. సబ్ రిజిస్ట్రార్ వైపు వేలు చూపిస్తూ ఏక వచనంతో మాట్లాడి అవమానకరంగా వ్యవహరించినట్లు కార్యాలయంలోని రెవెన్యూ అధికారులు బహిరంగంగా తెలుపుతున్నారు. దీనిపై తాసీల్దార్ జగదీశ్వర ప్రసాద్ ను వివరణ కోరగా తనను గిరిజన నాయకుడు బెదిరించిన మాట వాస్తవమేనని చెప్పారు. అప్పుడు చండ్రుగొండ పోలీసులకు సమాచారం ఇచ్చినా వారు వచ్చి ఎటువంటి చర్యలు తీసుకోలేదని, కనీసం మద్యం సేవించిన విషయం సైతం బ్రీత్ టెస్ట్ చేయలేదని, ఇటువంటి వ్యవస్థ చండ్రుగొండలో ఉందని ఆవేదన వ్యక్తం చేశారు

భద్రాద్రి కొత్తగూడెం, ఆగస్టు 12 : భద్రాద్రి కొత్తగూడెం సుజాతనగర్ మండలంలో 14 మంది కూలీలు అస్వస్థకు గురయ్యారు. రెండు రోజుల క్రితం సుజాతనగర్ మండలం కొత్త అంజినాపురంలో నర్రా అజయ్ పంట పొలంలో 20 మంది కూలీలు పనులు చేస్తున్నారు. పనులు చేసే క్రమంలో పొలం యజమాని మొక్కలకు పురుగుమందు స్ప్రే చేశాడు. స్ప్రే చేసిన సమయంలో కలుపు తీస్తుండగా వారికి పురుగుమందు స్ప్రే కండ్లు, ముక్కుల్లో పడడ‌తో ఆ వాసనకు వారు అస్వస్థకు గురయ్యారు. ఇంటికి వెళ్లిన తర్వాత వారికి వాంతులు, విరోచనాలు కావడంతో గమనించిన కుటుంబ సభ్యులు వారిని కొత్తగూడెం ప్రభుత్వ ఆస్ప‌త్రికి బుధవారం తీసుకువచ్చారు. ప్రస్తుతం వారంతా ప్రభుత్వ ఆస్ప‌త్రిలో చికిత్స పొందుతున్నారు. ఇద్దరు పరిస్థితి విషమంగా ఉండడంతో ఆస్పత్రి వైద్యులు ఐసీయూలో ఉంచి చికిత్స అందిస్తున్నారు. మిగతా 12 మంది పరిస్థితి మెరుగ్గా ఉన్నట్లు వైద్యులు తెలిపారు

బూర్గంపహాడ్, ఆగస్టు 12 : కోరలు చాచిన సర్పమైనా.. విషపూరితమైన సర్పమైనా.. ఎంతటి ప్రమాదకర సర్పమైనా సరే ఆయనకు బంధీయే. పాములు పట్టడంలో ఇతను నేర్పరి. ఎవరైనా సరే పామును పట్టుకోవాలని సమాచారం ఇస్తే చాలు... ఇట్టే అక్కడ వాలిపోతారు. వాటిని భయం, బెరుకు లేకుండా పట్టుకుని వెళ్లిపోతారు. అతనెవరో కాదు భద్రాచలం రాజీవ్‌న‌గ‌ర్‌కు చెందిన శ్రీనివాసశాస్త్రి. ఏపీలోని నర్సీపట్నంకు చెందిన ఈయన 20 ఏళ్లుగా భద్రాచలంలో నివాసం ఉంటూ సారపాక ఐటీసీ పీఎస్‌పీడీ కర్మాగారంలో విధులు నిర్వహిస్తున్నారు. ఈయన వృత్తి బాధ్యతతో పాటు పాములు పట్టుకోవడంలోనూ నేర్పరితనం సాధించారు. 15 ఏళ్ల క్రితం తాను నివాసం ఉండే ఇంట్లోకి పాము వచ్చింది. తమ పూర్వీకుల నుండి వచ్చిన విద్యతో దానికి ఎలాంటి హాని కలగకుండా పట్టుకుని అటవీప్రాంతంలో విడిచిపెట్టారు. అప్పటి నుండి నాగుపాము, కట్లపాము, రక్తపింజరు తదితర విషపూరిత ప్రమాదకర సర్పాలతో పాటు కొండచిలువ వంటి భారీ సర్పాలను సైతం తన చేతిలో బంధించి నిర్మానుష్య అటవీప్రాంతంలో వదిలేస్తారు. పాములు పట్టుకునే క్రమంలో రెండుసార్లు ప్రమాదానికి గురైనా సొంత ఖర్చులతో బాగు చేయించుకున్నారే తప్ప ఎవరినీ కూడా ఏ రూపంలోనూ సాయం ఆశించ‌లేదు. శ్రీనివాస శాస్త్రి ఇప్పటి వరకు 3వేల సర్పాలను పట్టుకుని అటవీప్రాంతంలో సురక్షితంగా వదిలిపెట్టారు. అయితే పాములు పట్టుకోవడానికి సరైన వస్తువులు లేవని ప్రభుత్వం స్పందించి పాములు పట్టుకునేందుకు స్టిక్‌తో పాటు బూట్లు, యూనిఫాం అందిస్తే ఉపయోగకరంగా ఉంటుందని శ్రీనివాసశాస్త్రి చెబుతున్నారు. శ్రీనివాసశాస్త్రిని ఇటీవల ఏపీ ఉప ముఖ్యమంత్రి పవన్ కల్యాణ్ సైతం అభినందించారు

Kothagudem: జంతువుల ఉచ్చుకు బలైన ఫారెస్ట్ బీట్ ఆఫీసర్ నవీన్! ఈ వార్తకు సంబంధించిన

కొత్తగూడెం ఏరియాలో డైరెక్టర్ (పి&పి) కె. వెంకటేశ్వర్లు ఆధ్వర్యంలో ఏరియా రివ్యూ సమావేశం రుద్రంపూర్, ఆగస్టు 11 : సింగరేణి కొత్తగూడెం ఏరియాలో నిర్దేశించిన ఉత్పత్తి లక్ష్యాలను సాధించేందుకు అధికారులు, ఉద్యోగులు సమన్వయంతో పని చేయాలని సింగరేణి డైరెక్టర్ (పి&పి) కె. వెంకటేశ్వర్లు సూచించారు. మంగళవారం కొత్తగూడెం ఏరియా జనరల్ మేనేజర్ కార్యాలయంలో ఆయన ఆధ్వర్యంలో ఏరియా రివ్యూ సమావేశం నిర్వహించారు. ఈ సందర్భంగా కొత్తగూడెం ఏరియా జనరల్ మేనేజర్‌గా ఇటీవల బాధ్యతలు స్వీకరించిన సీహెచ్.వెంకటరమణను డైరెక్టర్ (పి&పి) కె.వెంకటేశ్వర్లు శాలువాతో సత్కరించి, పుష్పగుచ్ఛం అందజేసి అభినందించారు. అనంతరం కొత్తగూడెం ఏరియా పరిధిలోని గనుల వారీగా బొగ్గు ఉత్పత్తి, ఉత్పాదకత, ప్రాజెక్టుల పురోగతి, ఓవర్‌బర్డెన్ తొలగింపు, బొగ్గు నాణ్యత, రవాణా, యంత్రాల వినియోగం తదితర అంశాలపై సమగ్రంగా సమీక్షించారు. ఆయా విభాగాల అధికారులు తమ విభాగాల పనితీరు, పురోగతిని డైరెక్టర్‌కు వివరించారు. ఈ సందర్భంగా కె. వెంకటేశ్వర్లు మాట్లాడుతూ.. సంస్థ నిర్దేశించిన ఉత్పత్తి లక్ష్యాలను సాధించేందుకు అన్ని విభాగాల అధికారులు సమన్వయంతో పనిచేయాలని అన్నారు. ఉత్పత్తి, ఉత్పాదకత పెంపుతో పాటు గనుల అభివృద్ధి పనులను నిర్దేశిత కాలవ్యవధిలో పూర్తి చేయాలని సూచించారు. గనుల్లో భద్రతకు అత్యంత ప్రాధాన్యత ఇవ్వాలని, భద్రతా ప్రమాణాల విషయంలో ఎట్టి పరిస్థితుల్లోనూ రాజీపడరాదని డైరెక్టర్ స్పష్టం చేశారు. కార్మికుల భద్రత, సంక్షేమాన్ని దృష్టిలో ఉంచుకుని ప్రమాదాల నివారణకు నిరంతరం అప్రమత్తంగా ఉండాలని అధికారులకు సూచించారు. ఉత్పత్తి లక్ష్యాల సాధనతో పాటు కార్మికుల సురక్షిత పని వాతావరణానికి ప్రాధాన్యత ఇవ్వాలని అన్నారు. సింగరేణి సంస్థ అభివృద్ధి, లక్ష్యాల సాధనకు సమష్టి కృషితో ముందుకు సాగాలని పిలుపునిచ్చారు. ఈ సమావేశంలో ఏరియా జీఎం సీహెచ్. వెంకటరమణ, ఎస్‌ఓ టు జీఎం ఎం. గోవిందరావు, పీవీకే ఏజెంట్ రామ్ భరోస్ మహాతో, ఫైనాన్స్ ఏజీఎం బిబత్స, సివిల్ ఏజీఎం రామకృష్ణ, డీజీఎం (ఐఈడీ) యోహన్, ఏరియా ఇంజనీర్ వి. రామకృష్ణ, పర్సనల్ మేనేజర్

జూలూరుపాడులో ప్రజా చైతన్య యాత్రకు నీరాజనాలు జూలూరుపాడు, ఆగస్టు 11 : ప్రజలకు ఇచ్చిన హామీలను విస్మరించి పాలన సాగిస్తే పాలకులకు ప్రజల నుండి తిరుగుబాటు తప్పదని, ప్రజాస్వామ్య పరిరక్షణకు దేశంలో తీవ్రమైన మార్పు రావాల్సిన అవసరం ఉందని సీపీఐ తెలంగాణ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు అన్నారు. సీపీఐ చేపట్టిన ప్రజా చైతన్య యాత్ర మంగళవారం జూలూరుపాడు మండల కేంద్రానికి చేరుకోగా, పార్టీ శ్రేణులు ఆయనకు ఘనంగా స్వాగతం పలికారు. ప్రజా సమస్యల పరిష్కారమే ధ్యేయంగా సాగిన ఈ యాత్రలో భాగంగా ప్రధాన రహదారిపై పార్టీ శ్రేణులతో భారీ ర్యాలీ నిర్వహించారు. అనంతరం స్థానిక ప్రధాన కూడలిలో ఏర్పాటు చేసిన బహిరంగ సభలో కూనంనేని మాట్లాడుతూ.. కేంద్రంలో మోదీ ప్రభుత్వం ప్రజాస్వామ్యాన్ని పరిహసిస్తూ నియంతృత్వ పోకడలతో పాలన సాగిస్తోందని తీవ్రస్థాయిలో ధ్వజమెత్తారు. ఏడాదికి రెండు కోట్ల ఉద్యోగాల కల్పన, ఖాతాల్లో రూ.15 లక్షల జమ వంటి హామీలను గాలికి వదిలేసి, మత విద్వేషాలను రెచ్చగొడుతూ కాలక్షేపం చేస్తోందని ఆరోపించారు. ఇటీవల వెలుగుచూసిన నీట్ కుంభకోణంతో లక్షలాది మంది విద్యార్థులు, యువత భవిష్యత్‌ను చీకట్లోకి నెట్టారని విమర్శించారు. దీనికి నిరసనగా ఢిల్లీలోని జంతర్ మంతర్ వేదికగా యువత సాగించిన పోరాటం కేంద్ర ప్రభుత్వానికి చెంపపెట్టుగా మారిందన్నారు. దేశ సంపదను కొద్దిమంది కార్పొరేట్ శక్తులకు కట్టబెడుతున్న తీరును ఎండగడుతూ, సామాజిక-రాజకీయ మార్పు కోసం సీపీఐ ముందుండి పోరాడుతుందని స్పష్టం చేశారు. అదేవిధంగా రాష్ట్రంలోనూ ప్రజా సమస్యలను పరిష్కరించడంలోనూ, హామీల అమలులోనూ అలసత్వం వహిస్తే ప్రజలే గుణపాఠం చెబుతారని హెచ్చరించారు. ఈ కార్యక్రమంలో సీపీఐ జిల్లా కార్యదర్శి ఎస్.కే. షాబీర్ పాషా, రాష్ట్ర కార్యవర్గ సభ్యులు ముత్యాల విశ్వనాథం, కల్లూరి వెంకటేశ్వర్లు, పుల్లారెడ్డి, కొత్తగూడెం మేయర్ మూడూ గణేష్, జిల్లా కార్యవర్గ సభ్యులు చండ్ర నరేంద్ర కుమార్, నరాటి ప్రసాద్, చంద్రగిరి శ్రీనివాస్, కంచర్ల జమలయ్య, భూక్యా శ్రీనివాస్, ఎస్.కే. ఫయాజ్, వరక

జూలూరుపాడు, ఆగస్టు 11 : జిల్లా కలెక్టర్, జిల్లా వైద్య ఆరోగ్య శాఖాధికారుల ఆదేశాల మేరకు జూలూరుపాడు ప్రాథమిక ఆరోగ్య కేంద్రం ఆధ్వర్యంలో మంగళవారం అనంతారం గ్రామ పంచాయతీ కార్యాలయంలో ఉచిత క్షయ వ్యాధి నిర్ధారణ, అవగాహన శిబిరాన్ని నిర్వహించారు. ఈ కార్యక్రమానికి స్థానిక సర్పంచ్ కొర్సా రమేశ్‌ ముఖ్య అతిథిగా హాజరై, శిబిరాన్ని ప్రారంభించారు. పి.హెచ్.సి వైద్యులు డాక్టర్ బి.వెంకటేశ్వర్లు, డాక్టర్ కె.రాధిక మాట్లాడుతూ.. గ్రామ ప్రజల ఆరోగ్య పరిరక్షణకు ప్రభుత్వం ప్రత్యేక చర్యలు తీసుకుంటోందని, అందులో భాగంగానే గ్రామీణ ప్రాంతాల్లో ఇటువంటి ఉచిత వైద్య శిబిరాలు ఏర్పాటు చేస్తున్నట్లు తెలిపారు. టిబి అనేది భయపడాల్సిన వ్యాధి కాదు. ముందస్తు పరీక్షల ద్వారా వ్యాధిని ప్రారంభంలోనే గుర్తించి, క్రమం తప్పకుండా మందులు వాడితే పూర్తిగా నయం చేయవచ్చు అన్నారు. ప్రభుత్వ ఆస్ప‌త్రుల్లో టిబి బాధితులకు ఉచితంగా నాణ్యమైన వైద్యం, మందులతో పాటు పౌష్టికాహారం కోసం ఆర్థిక సహాయం కూడా అందిస్తున్నారు. గ్రామస్తులు ఈ సౌకర్యాన్ని ఉపయోగించుకోవాలి అని ఆయన కోరారు. టిబి లక్షణాలు ఉన్నవారిని గుర్తించి వ్యాధి నిర్ధారణ పరీక్షల కోసం నమూనాలను సేకరించినట్లు తెలిపారు. రెండు వారాలకు పైగా దగ్గు, సాయంత్రం వేళల్లో జ్వరం, బరువు తగ్గడం, ఆకలి మందగించడం వంటి లక్షణాలు ఉంటే వెంటనే సమీపంలోని ప్రాథమిక ఆరోగ్య కేంద్రాన్ని సంప్రదించాలని సూచించారు. ఈ వైద్య శిబిరంలో హెల్త్ సూపర్‌వైజర్ ఇ.పుల్లమ్మ, ఎంపీహెచ్ఏ ఫస్ట్ ఏఎన్ఎం, అనంతారం పంచాయతీ కార్యదర్శి శైలజ, హెల్త్ డిపార్ట్‌మెంట్ సిబ్బంది కిరణ్, శ్రీనివాస్, ఆశా కార్యకర్తలు పాల్గొన్నారు

– రూ.8 కోట్ల స్కాంలో సూత్రధారులు ఎవరు? – మున్సిపల్ అధికారులపై ఫిర్యాదు చేస్తాం కొత్తగూడెం గణేష్ టెంపుల్, ఆగస్టు 11 : కొత్తగూడెం మున్సిపల్ కార్పొరేషన్‌లో నిబంధనలను పూర్తిగా తుంగలో తొక్కి పారదర్శకత లేకుండా నిర్వహించిన రూ.9 కోట్ల 60 లక్షల డిపిఆర్ టెండర్ ప్రక్రియను తక్షణమే రద్దు చేసి ఎమ్మెల్యే కూనంనేని చిత్తశుద్ధి నిరూపించుకోవాలని జైభీమ్ రావు భారత్ పార్టీ స్టేట్ వర్కింగ్ ప్రెసిడెంట్ యెర్రా కామేష్ డిమాండ్ చేశారు. మంగళవారం జేబీపీ ఆధ్వర్యంలో కలెక్టరేట్ ఎదుట నిరసన తెలిపారు. ఈ సందర్భంగా ఆయన మాట్లాడుతూ.. కొత్తగూడెం కార్పొరేషన్ పరిధిలో అభివృద్ధి పనుల కోసం డిపిఆర్ లో రూ.9 కోట్ల 60 లక్షల విలువ చేసే టెండర్ ను కేవలం మూడు రోజులు మాత్రమే సమయం కేటాయించి మూడు రోజుల్లోనే టెండర్ ఓపెన్ చేయడం పూర్తిగా నిబంధనలకు వ్యతిరేకమన్నారు. కేవలం రెండు దరఖాస్తులు మాత్రమే వచ్చినప్పుడు వాటిని రద్దు చేసి మరలా టెండర్ నిర్వహించాలని, కానీ అలా చేయకుండా మున్సిపల్ అధికారులు ప్రభుత్వ నిబంధనలకు వ్యతిరేకంగా టెండర్ ఓపెన్ చేశారని, నిబంధనలను తుంగలో త్రొక్కి టెండర్ ఓపెన్ చేసిన అధికారులపై ఉన్నత స్థాయి అధికారులకు ఫిర్యాదు చేస్తామని తెలిపారు. రూ.9 కోట్ల 60 లక్షల పనికి కనీసం 14 రోజుల గడువు ఇవ్వాలనే ఈ ప్రొక్యూర్మెంట్ నిబంధనలు ఉన్నాయన్నారు. టెండర్ ప్రక్రియలో రూ.8 కోట్ల స్కామ్ జరిగే అవకాశం ఉందని అసలు రూ.8 కోట్ల స్కాంలో సూత్రధారులు ఎవరని ప్రశ్నించారు. అధికారులు, స్థానిక శాసనసభ్యులు తక్షణమే టెండర్ రద్దు చేయాలని, లేనియెడల కలిసి వచ్చే అన్ని రాజకీయ పార్టీలతో కలిసి డిపిఆర్ టెండర్ రద్దు అయ్యేవరకు పోరాడుతామని, అవసరమైతే న్యాయస్థానానికైనా వెళ్తామని హెచ్చరించారు. ఈ కార్యక్రమంలో జిల్లా అధ్యక్షుడు గంధం మల్లికార్జునరావు, కొత్తగూడెం నియోజకవర్గ అధ్యక్షుడు నాగుల రవికుమార్, పట్టణ అధ్యక్షుడు గజ్జల శంకర్ పాల్గొన్నారు

బూర్గంపహాడ్, ఆగస్టు 11 : సారపాక పంచాయతీలోని సుందరయ్యనగర్‌లో సీసీ రోడ్లు, డ్రైనేజీ నిర్మాణం ఏర్పాటు చేయాలని కాలనీవాసులు మంగళవారం సీపీఎం మండల కార్యదర్శి బత్తుల వెంకటేశ్వర్లుతో కలిసి తమ ఆవేదన వెలిబుచ్చారు. ఈ కాలనీలో గుత్తేదారు మూడు రోడ్లకు సంబంధించి మట్టిని తొలగించి ట్రాక్టర్ బ్లేడ్ సహాయంతో రెండుసార్లు లెవలింగ్ చేశారని, అయినా ఇప్పటివరకు సీసీ రోడ్లు నిర్మాణం చేపట్టలేదని ఆవేదన వ్యక్తం చేశారు. ఈ సమస్యను ఇప్పటికే సర్పంచ్ దృష్టికి తీసుకువెళ్లామని, హామీలు ఇస్తున్నారే తప్ప పని జరగడం లేదని బత్తుల ఆరోపించారు. ఈ నెల 15లోగా రోడ్ల పనులు ప్రారంభించకపోతే టెంట్ వేసి నిరసన తెలుపుతామని హెచ్చరించారు. మరోవైపు డ్రైనేజీ లేకపోవడంతో మురుగునీటితో ఇబ్బందులు ఎదుర్కొంటున్నామని సమస్యను పరిష్కరించి డ్రైనేజీ సైతం ఏర్పాటు చేయాలని డిమాండ్ చేశారు. ఈ కార్యక్రమంలో కాలనీవాసులతో పాటు మండల కమిటీ సభ్యురాలు పాపినేని సరోజిని, ఎస్కే.అబీదా, కనకం వెంకటేశ్వర్లు, జయమ్మ, అలివేలు, నిర్మల, సయ్యద్ షాహదా, ప్రియాంక, జరీనా, షకీరా పాల్గొన్నారు

కొత్తగూడెం గణేష్ టెంపుల్, ఆగస్టు 11 : ఇల్లటూరి హరీశ్‌ అనే వ్యక్తికి బీఆర్ఎస్‌వీతో ఎటువంటి అధికారిక సంబంధం లేదని బీఆర్ఎస్‌వీ భద్రాద్రి కొత్తగూడెం జిల్లా అధ్యక్షుడు సంకుబాపన అనుదీప్ మంగళవారం ఒక ప్రకటనలో తెలిపారు. సదరు వ్యక్తి ఆర్గనైజేషన్‌లో ఎప్పుడూ పని చేయలేదని, సంస్థలో ఎటువంటి అధికారిక బాధ్యతను నిర్వహించలేదని తెలిపారు. బీఆర్ఎస్‌వీ పేరును ఉపయోగిస్తూ కొత్తగూడెం పట్టణంలోని కొన్ని విద్యా సంస్థల వద్ద హడావిడి సృష్టిస్తున్నట్లు తమ దృష్టికి వచ్చిందని పేర్కొన్నారు. తెలంగాణ ఉద్యమ స్ఫూర్తితో విద్యార్థుల సమస్యలపై పోరాడుతూ, విద్యార్థుల హక్కుల కోసం ప్రజాస్వామ్య పద్ధతుల్లో పని చేస్తున్న సంస్థ బీఆర్ఎస్‌వీ అని, సంస్థకు సంబంధం లేని వ్యక్తులు సంస్థ పేరు చెప్పుకుని విద్యాసంస్థల వద్ద కార్యక్రమాలు నిర్వహించడం, విద్యార్థుల్లో గందరగోళం సృష్టించడం లేదా సంస్థ ప్రతిష్ఠకు భంగం కలిగించే విధంగా వ్యవహరించడం సరికాదని ఆయన అన్నారు. బీఆర్ఎస్‌వీ పేరుతో ఎవరైనా వ్యక్తిగతంగా కార్యకలాపాలు నిర్వహించినా, అలాంటి వ్యక్తులకు సంస్థతో ఎటువంటి సంబంధం లేదని విద్యార్థులు, విద్యా సంస్థల యాజమాన్యాలు, ప్రజలు గమనించాలని ఆయన కోరారు