ఆకివీడు రామాలయం నిర్మాణంలో రఘురామ దూకుడు
పశ్చిమ గోదావరి జిల్లా ఆకివీడు పెదపేటలో నిర్మిస్తున్న చారిత్రాత్మక రామాలయ పునర్నిర్మాణ పనులలో ఏపీ అసెంబ్లీ డిప్యూటీ స్పీకర్, ఉండి ఎమ్మెల్యే రఘురామకృష్ణంరాజు (RRR) తన మార్కు దూకుడు చూపిస్తున్నారు. కోర్టు వివాదాలు, అనేక రాజకీయ అడ్డంకులను దాటుకుంటూ ఇటీవల సుప్రీంకోర్టు(Supreme Court) నుండి గ్రీన్ సిగ్నల్ సాధించిన ఆయన, ఏమాత్రం ఆలస్యం చేయకుండా ఆలయ పనులను పరుగులు పెట్టిస్తున్నారు. ఈ సాయంత్రం ఆకివీడు రామాలయం ప్రాంగణాన్ని స్వయంగా సందర్శించిన రఘురామకృష్ణంరాజు, పనుల ప్రగతిని పరిశీలించడమే కాకుండా భక్తులకు సరికొత్త జోష్ నింపే శుభవార్తలను సామాజిక మాధ్యమాల ద్వారా పంచుకున్నారు. ఆలయ పరిధిని మరింత విస్తృతం చేసే క్రమంలో ఈరోజు దేవాలయానికి తూర్పు వైపున ఆనుకొని ఉన్న కీలకమైన 9 సెంట్ల స్థలాన్ని రూ. 37 లక్షల భారీ వ్యయంతో కొనుగోలు చేసినట్లు రఘురామ ప్రకటించారు. ఆలయ పునాది పనులు వేగంగా సాగుతున్న తరుణంలో, పక్కనే ఉన్న ఈ స్థలాన్ని కూడా సేకరించడం ఆలయ ప్రాంగణాన్ని మరింత సుందరంగా తీర్చిదిద్దేందుకు ఉపయోగపడనుంది. ఈ నిర్ణయంతో రామాలయ నిర్మాణ సంకల్పంలో రఘురామ ఎంతటి పట్టుదలతో ఉన్నారో మరోసారి స్పష్టమైంది. అంతేకాకుండా, ఆలయ భవన నిర్మాణ ప్రక్రియకు సంబంధించి ఆయన డెడ్లైన్ కూడా విధించారు. ఆగస్టు 16వ తారీఖు నుండి గన్నవరం వద్ద ఇప్పటికే సిద్ధంగా ఉంచిన ప్రత్యేక కృష్ణశిలల శిలాకృతుల అమరిక పనులు అధికారికంగా ప్రారంభం కానున్నాయని తెలిపారు. ఈ కృష్ణశిలలతో నిర్మించే ఆలయం దాదాపు 8 శతాబ్దాల పాటు చెక్కుచెదరకుండా నిలుస్తుందని రఘురామ గతంలోనే వెల్లడించారు. ఈ అక్టోబర్ 20న రానున్న పవిత్ర విజయదశమి (దసరా) పర్వదినం నాటికే ఈ భవ్య మందిర నిర్మాణాన్ని పూర్తి చేసి, భక్తుల రథసారథి శ్రీరాముడిని కొలువుదీరుస్తామని రఘురామకృష్ణంరాజు ధీమా వ్యక్తం చేశారు