అక్కినేని యంగ్ హీరో అఖిల్ అక్కినేని ఎట్టకేలకు లెనిన్ సినిమాతో భారీ విజయాన్ని అందుకున్నాడు. ఇక లెనిన్ ప్రమోషన్స్ లో అఖిల్ చాలా మెచ్యూర్డ్ గా కనిపించాడు. అలాగే మాట్లాడాడు.
అక్కినేని యంగ్ హీరో అఖిల్ అక్కినేని (Akhil Akkineni) ఎట్టకేలకు లెనిన్ సినిమాతో భారీ విజయాన్ని అందుకున్నాడు. ఇక లెనిన్ ప్రమోషన్స్ లో అఖిల్ చాలా మెచ్యూర్డ్ గా కనిపించాడు. అలాగే మాట్లాడాడు. అతడిలోని పరిపక్వత చూసి ఫ్యాన్స్ సైతం సంతోషించారు. అందుకే తన తదుపరి ప్రాజెక్ట్ విషయంలో చాలా జాగ్రత్తగా అడుగులు వేస్తున్నాడు. లెనిన్ తో వచ్చిన హిట్ ని గుర్తుపెట్టుకొని ప్రేక్షకులు తనను ఎలా చూడాలనుకుంటున్నారో అలా మారుతున్నాడు. అయితే, గత కొన్ని రోజులుగా ఆయన చేయబోయే తదుపరి చిత్రం గురించి సోషల్ మీడియాలోనూ, ఫిల్మ్ నగర్ వర్గాల్లోనూ రకరకాల వార్తలు, ఊహాగానాలు షికారు చేస్తున్నాయి. పలువురు దర్శకుల పేర్లు తెరపైకి వచ్చాయి. ముఖ్యంగా పవన్ సాధినేని దర్శకత్వంలో అఖిల్ సినిమా చేస్తున్నాడు అంటూ వార్తలు గుప్పుమన్నాయి. దీంతోఅభిమానుల్లోనూ తీవ్ర గందరగోళం నెలకొంది.
ప్రేమ ఇష్క్ కాదల్ సినిమాతో ఇండస్ట్రీకి పరిచయం అయ్యాడు పవన్ సాధినేని. దీని తరువాత సావిత్రి, సేనాపతి లాంటి సినిమాలు చేశాడు. అవేమీ ఆశించిన ఫలితాలను అందుకోలేదు. ప్రస్తుతం ఆయన దుల్కర్ సల్మాన్ తో ఆకాశంలో ఒక తార సినిమాను తెరకెక్కించాడు. ఈ సినిమా రిలీజ్ కు సిద్ధమవుతోంది. ఇక దీని తరువాత అఖిల్ తోనే సినిమా అంటూ వార్తలు పుట్టుకొచ్చాయి. ఇప్పటికే పవన్.. అఖిల్ కి కథ వినిపించాడని, కథ నచ్చడంతో అయ్యగారు గ్రీన్ సిగ్నల్ కూడా ఇచ్చినట్లు పుకార్లు వచ్చాయి. దీంతో అఖిల్ పీఆర్ టీమ్ రంగంలోకి దిగి అసలు నిజం చెప్పింది.
'అఖిల్ అక్కినేని ఇప్పటివరకు తన తదుపరి ప్రాజెక్ట్ను అధికారికంగా సంతకం చేయలేదు. కాబట్టి ఈ విషయమై ప్రచారంలో ఉన్న ఎలాంటి రూమర్లను నమ్మవద్దని, వాటిని సోషల్ మీడియాలో షేర్ చేయవద్దని అందరినీ కోరుతున్నాం. ఆయన తదుపరి చిత్రానికి సంబంధించిన అధికారిక ప్రకటనను త్వరలోనే మేమే స్వయంగా వెల్లడిస్తాం' అంటూ చెప్పుకొచ్చారు. ఈ ప్రకటనతో అఖిల్ నెక్స్ట్ మూవీపై వస్తున్న అన్ని రకాల పుకార్లకు చెక్ పడింది. కథల ఎంపికలో ఏమాత్రం తొందరపడకుండా, పక్కా ప్రణాళికతో ఒక పవర్ఫుల్ అండ్ వైవిధ్యమైన ప్రాజెక్ట్ను సెట్ చేసే పనిలో అఖిల్ ఉన్నారు. త్వరలోనే రాబోయే ఆ అధికారిక సర్ప్రైజ్ కోసం అక్కినేని అభిమానులు ఆసక్తిగా ఎదురుచూస్తున్నారు.
